महेन्द्रनगर । २०६४ को संविधान सभा निर्वाचनपछि सबैका निर्वाचन बहिस्कार गरेको विप्लव नेतृत्वको नेकपा माओवादी चुनावमा सहभागी भए पनि केही जिल्लामा मतदाताले स्वस्फर्त मतदान नगरी बहिस्कार गरेका छन् ।
बाँके राष्ट्रिय निकुञ्जबाट प्रभावित भई बस्ती स्थानान्तरणको माग गर्दै आन्दोलनरत स्थानीयले दाङमा निर्वाचन बहिष्कार गरेका छन् । आन्दोलनरत पीडितहरूले मतदानमा सहभागी नहुने निर्णय गरेपछि केही मतदान केन्द्र सुनसान बनेका छन्।
दाङ निर्वाचन क्षेत्र–३ अन्तर्गत बबई गाउँपालिका–७ स्थित देउती माध्यमिक विद्यालय मलई मतदान केन्द्र र बबई गाउँपालिका–१ को जनता आधारभूत विद्यालय जिल्ला मतदान केन्द्रमा अहिलेसम्म मतदाता उपस्थित नभएको जनाइएको छ ।
बस्ती स्थानान्तरणको माग पूरा नभएको भन्दै स्थानीयले मतदान केन्द्र बहिष्कार गरेका कारण केन्द्रहरू खाली भएका छन्।यसैबीच सुदूरपश्चिमका केही दुर्गम क्षेत्रमा पनि मतदान केन्द्रमा मतदाता नआएको खबर आएको छ ।
दार्चुलाको नौगाढ गाउँपालिका–१ नागुस्थित गौरीशंकर माध्यमिक विद्यालय मतदान केन्द्र र अपि हिमाल गाउँपालिका–३ दुधिलास्थित झाक्सु मतदान केन्द्रमा मतदान सुरु भएको लामो समयसम्म पनि मतदाता नपुगेको जनाइएको छ ।
यस्तै बझाङको तालकोट गाउँपालिका–४ स्थित लुकड मतदान केन्द्रमा पनि मतदान सुरु भइसकेपछि लामो समयसम्म मतदाता नआउँदा केन्द्र सुनसान देखिएको छ ।
