महेन्द्रनगर । नेकपा एमालेका साँसद डा. दिपक प्रकश भट्टले महाकाली सिँचाई आयोजना तेस्रो चरण अन्र्तगत नहरका शाखा उपशाखा बनाउन समस्या आउन सक्ने भन्दै सम्बन्धित मन्त्रालयको ध्यानाकर्षण गराएका छन् ।
बुधबार संसद बैठकको शुन्य समयमा साँसद भट्टले एकीकृत महाकाली सन्धि अनुसार गरिएको सर्भेका आधारमा अहिले नहरका शाखा र उप शाखा बनाउन वासिन्दा आक्रोशित हुन पुगेकाले सिँचाई मन्त्रालयको ध्यानाकर्षण गराएका छन् ।
‘१९९६ मा गरिएको सन्धि अनुसार सर्भे गरियो, त्यो सर्भे गरिएको स्थानमा अहिले अर्बान सहर बसि सकेको छ’ साँसद भट्टले भने,‘त्यस सर्भे अनुसार शाखा उपशाखा त्यहाँ बनाउँदा समस्या हुन्छ, म सम्बन्धित मन्त्रालयको यसमा ध्यानाकर्षण गराउन चाहन्छु ।’
साँसद भट्टले नहर सर्भे हुँदा र अहिलेको जनसंख्या दोब्बर बढेर सहरीकरण भएको उल्लेख गरे ।
