सुरेन्द्र विष्ट : खैरभट्टी कुतियाकवर विकास मोडेल लिएर प्रदेश सभा सदस्यका चुनावी मैदानमा छन्, जो जहाँ लड्छन्, त्यहाँ जित्छन्
महेन्द्रनगर । कञ्चनपुर निर्वाचन क्षेत्र नं. ३ ख मा नेकपा एमाले कञ्चनपुरका अध्यक्ष सुरेन्द्र विष्ट उम्मेदवार छन् । उनीसंग सत्ता गठबन्धनका काँग्रेसका महाधिवेशन प्रतिनिधि बेल बहादुर राना सहित चार जना प्रतिस्पर्धा छन् । अघिल्लो स्थानीय तह निर्वाचनमा स्थानीय तह २०७४ मा भीमदत्त नगरपालिकाको मेयर भई हाल प्रदेश सभा सदस्यका लागि चुनावी मैदानमा होमिएका छन् ।
उम्मेदवार विष्ट २०४७ सालदेखि सक्रिय राजनीतिमा लागेपछि कुनै पनि चुनावमा पराजित नभएको रेकर्ड बनाएका छन् । २०५३ मा उनी सिद्धनाथ बहुमुखी क्याम्पसको स्वतन्त्र विद्यार्थी युनियन (स्ववियु) सभापति निर्वाचित भएका थिए । त्यसपछि उनी निरन्तर चुनाव जित्दै आएका छन् ।
२०६६ सालमा नेकपा एमाले कञ्चनपुरको जिल्ला कमिटी उपसचिव तथा प्रचार विभाग प्रमुख बनेका विष्ट २०६९ सालमा नेकपा एमाले कञ्चनपुरको जिल्ला कमिटी सचिव तथा संगठन विभाग प्रमुख बनेका थिए । २०७४ सालमा उनी भीमदत्त नगरपालिकाको नगर प्रमुख (मेयर) निर्वाचित भएका थिए । २०७८ पुसमा भएको पार्टीको कञ्चनपुर जिल्ला अधिवेशनबाट विष्ट जिल्ला अध्यक्ष पदमा निर्वाचित भएका छन् ।
कांग्रेसको प्रभाव क्षेत्र मानिएको भीमदत्त नगरपालिकामा मेयर निर्वाचित भइसकेका विष्टले आफूले मेयर हुँदा गरेका काम र विकास–निर्माण कार्यलाई देखाएर प्रचारप्रसार गरिरहेका छन् ।
विष्टले आफ्नो कार्यकालमा भीमदत्त नगरपालिका उत्कृष्ट भएको बताउँदै बाँकी रहेका काम पूरा गर्ने र दोधारा चाँदनीलाई विकासको अनुभूति गराउने प्रतिबद्धता जाहेर गरेका छन् ।
उनी खैरभट्टी कुतियाकवर विकास मोडेल लिएर चुनावी मैदानमा होमिएका हुन् । उनले २० बुँदे प्रतिवद्धता लगेर मतदातालाई मत मागेका छन् ।
