महेन्द्रनगर । कञ्चनपुर निर्वाचन क्षेत्र नं. ३ का प्रतिनिधि सभा सदस्यका एमाले उम्मेदवार निरुदेवी पालले मतदाताको साथ सहयोग पाउनेमा ढुक्क भएको बताएकी छन् । भीमदत्त नगरपालिका १७ स्थित महाकाली विद्यालय मतदान केन्द्रमा मतदान गरेपछि उनले मतदाताको उत्साहबाट आफू हौसिएको बताइन् ।
‘मतदान स्थलमा मतदान गर्न आउनु भएको सबै मतदाताको उत्साहबाट म निकै खुसी छु, साथ र सहयोग पाउनेमा ढुक्क छु’ उनले भनिन् ।
भीनपा १७ का पालले यस अघि २०६५ को संविधान सभा सदस्य उप निर्वाचनमा आफ्नो वडाको अधिकाँश मत पाएकी छन् । उनी यस पटक पनि अधिकाँश मत पाउनेमा विश्वस्त देखिएकी छन् ।
प्रतिनिधि सभा सदस्यका उम्मेदवार पाल विहान मतदान गरेपछि अन्य वडामा पुगेकी छन् । उनी अहिलेसम्म भीमदत्तका १९,२, ३ र ८ नम्बर वडा बाहेक सबै वडामा पुगेकी छन् । ती वडापछि उनी दोधारा चाँदनी जाने छिन् ।
एमालेका प्रदेश सभा सदस्यका उम्मेदवार सुरेन्द्र विष्ट विहानदेखि दोधारा चाँदनीमा छन् । उनी दोधारा चाँदनीका सबै वडा मतदान केन्द्र पुगेर भीमदत्त आउने छन् ।
