महेन्द्रनगर । आर्थिक तरलतामा गुज्रिरहेको शिवशिखर सहकारीले धनगढीमा रहेको सेवा कार्यालय बन्द गरेको छ । सेवा कार्यालय नै बन्द गरिएपछि शेयरधनी थप समस्यामा परेका हुन् ।
भक्तपुरमा केन्द्रीय कार्यालय रही देशभर सेवा विस्तार गर्दै आएको शिवशिखरले सेयरधनी र ग्राहकको रकम फिर्ता गर्न नसक्ने भन्दै आजबाट धनगढी सेवा कार्यालय नै बन्द गरेको हो ।
सहकारीका सुदूरपश्चिम प्रदेश प्रमुख हेमराज जोशीले सुचना जारी गर्दै पुँजी व्यवस्थापन हुन नसक्दा तथा बजारको लगानी (कर्जा) असुली नभएकाले केही दिनका लागि सेवा बन्द गरिएको बताएका छन् ।
सहकारी आर्थिक संकटमा परेको खबर बाहिर आएपछि सहकारीका देशभरका सेयरधनी र ग्राहकले धमाधम रकम झिक्न थालेका हुन् ।
‘हालको मन्दीका कारण सबै बचतकर्ता एकैपटक चल्ती खाता, मुद्दती रकम र सेयर रकम झिक्न आउँदा’ पुँजी व्यस्थापन हुन नसकेको सहकारीले सार्वजनिक सूचना जारी गरेर दाबी गरेको छ ।
शिवशिखरको बुटवल सेवा कार्यालयका बचतकर्ता ठगिएको खबर सार्वजनिक भएपछि धनगढी, कञ्चनपुर, महेन्द्रनगर अत्तरिया लगायतका सेवा कार्यालयबाट बचत, मुद्दती र सेयर रकम फिर्ता गर्ने बढेका छन् ।
