गड्डाचौकीमा भारतीय बल मिच्याई विरुद्ध मौन बसेको भन्दै दलहरुप्रति देखिन थाल्यो आक्रोश, एमाले नेता खरेल भन्छन्– माननीय रमेश सरको धारणा सुन्न पाए कान पवित्र हुने थिए

महेन्द्रनगर । भारतले पश्चिमी सीमा नाकामा एकलौटी संरचना बनाएको विषयमा राजनीतिक दलहरु मौन बसेको भन्दै आक्रोश पोख्न थालिएको छ । भारतले नेपाललाई जानकारी नदिई एकलौटी रुपमा गड्डाचौकी सीमा नाकाको सीमा स्तम्भसम्म सडक कालोपत्रे गरेपछि स्थानीय स्तरमा व्यापक विरोध भएको छ ।

एमाले केन्द्रीय लेखा आयोगका सदस्य ईश्वरी प्रसाद खरेलले दलहरु मौन बसेकोमा प्रश्न सोधेर धारणा मागेका छन् । उनले दलहरुलाई सीमा क्षेत्रमा भारतले एकलौटी बनाएका संरचनामा किन मौन बसेको भन्दै धारणा मागेका हुन् ।

उनले संघीय साँसद र रमेश लेखक सहित सुदूरपश्चिम प्रदेशका साँसदहरु पनि मौन बसेको आपत्ति जनाएका छन् । ‘कञ्चनपुरका राजनैतिक पार्टीहरुको धारणा के हो किन नबोलेको नि ? कञ्चनपुरकै माननीयज्यू प्रतिनिधि सभा सदस्यज्यूहरु ,प्रदेश सभा का सदस्यज्यूहरु कतातिर घिउ खाँदै हो किन नबोलेको ? या ठिक हो भन या हाम्रो पहलमा बनाउन लगाएको भन केह त बोल ?’ खरेलले आफ्नो फेसबुकमा भनेका छन् ।

उनले ब्रह्मदेब र जिमुवा लगायतका स्थानमा भारतले नेपाली भूमिमा विकास निर्माण कार्य अवरोध गर्दा समेत राजनीतिक दल र साँसदहरु मौन बसेकोमा नेता खरेलले आक्रोश पोखेका छन् ।

‘हामीले ब्रम्हदेवमा कालो पत्रे गर्दा भारतले रोक्यो ! जिमुवा कालो पत्रे गर्दा रोक्यो ! कञ्चनपुरकै विभिन्न ठाउँमा भारतले रोक्यो ! तपाईंहरुको बोली त्यति खेर पनि फुटेन ! माननीय रमेश सरको धारणा हामीले पनि सुन्न पाए हाम्रा कान पवित्र हुने थिए सर त्यस्तै ज्यूहरुको धारणा पनि सुन्न पाउ प्रभो ! ख्वामित !’ उनले लेखेका छन् ।

गड्डाचौकीस्थित नेपाल भारत सीमा स्तम्भ नं. ८०५ ÷१ (७) सम्म पुग्ने गरी भारतले एकलौटी रुपमा सडक कालोपत्रे गरेको छ । भारतले सडक मर्मत गर्ने भन्दै धमाधम सडक कालोपत्रे गरेको गरेको हो । अहिले भारतले सडक कालोपत्रे गरेको क्षेत्र नजिक नेपाली भूमिमा गत असारमा ग्राभेल गर्दा भारतीय एसएसबीले अवरोध गरेको थियो ।

भीमदत्त नगरपालिका ११ का वडा अध्यक्ष प्रकाश थापाले बताए दुई देशको सहमति विना सीमा क्षेत्रमा संचरना बनाउन नमिल्ने भए पनि भारतले एकलौटी रुपमा सडक कालोपत्रे गरेको बताए ।

‘नेपाली पक्षले आफ्नै भूमिमा संरचना निर्माण गर्दा अवरोध गर्ने अनि दशगजा र सीमा पिलर क्षेत्रमै पुगेर सडक कालोपत्रे कार्य निन्दनीय भएको छ’ वडा अध्यक्ष थापाले भनेका थिए ।

सम्बन्धित
Loading...