भीमदत्तले बहुमत सदस्यको निर्णय अटेर गरी आफूलाई अपमानित गरेको भन्दै ज्येष्ठ वडा सदस्य विक राजीनामा दिने मनस्थितिमा
महेन्द्रनगर । आफूलाई कार्य वाहक बनाउने बहुमत सदस्यको निर्णय अटेर गरी भीमदत्त नगरपालिकाले एकलौटी रुपमा कार्य वाहक वडा अध्यक्ष बनाएको भन्दै ज्येष्ठ वडा सदस्य शारदा बिकले राजीनामा दिने मनस्थिति बनाएकी छन् ।
भीमदत्त नगरपालिका ६ नम्बरको वडा समितिले बहुमतका आधारमा ज्येष्ठ वडा सदस्य बिकलाई कार्य वाहक वडा अध्यक्ष बनाउने निर्णय गरेका थिए । उनलाई कार्यवाहक दिन वडा सदस्य देबकी जोशीले विमति राखेकी थिइन् ।
विकलाई दुई सदस्यले साथ दिएर कार्य वाहक दिने निर्णय भएपछि वडा कार्यालयबाट बाहिरिकी वडा सदस्य जोशीलाई भीमदत्तका मेयर पदम बोगटीले बुधबार विहान कार्य वाहकको जिम्मेवारी दिएका हुन् । उनी विकलाई कार्य वाहक दिएपछि आफू वडा कार्यालय नआउने भन्दै बाहिरिएकी थिइन् ।
दुई सदस्यले साथ दिएर पनि आफूलाई अपमानित हुने गरी मेयर बोगटीले एकलौटी रुपमा जोशीलाई कार्य वाहक बनाएपछि उनी असन्तुष्ट भएकी छन् । उनले आफ्ना समर्थकलाई अपमानको सहन नसकेर राजीनामा दिने मनस्थिति बनाएको बताएकी छन् ।
२०७९ को स्थानीय तह निर्वाचनमा उनी दलित महिलाबाट वडा सदस्य निर्वाचित भएकी हुन् । वडा समितिको बैठकमा विकलाई कार्य बनाउन वडा सदस्यद्वय लाली चन्द र दिपेन्द्र जोशीले समर्थन गरेका थिए ।
भीमदत्त नगरपालिकाले उप मेयर निलम लेखक जोशी सहित केही वडा अध्यक्षहरुसित छलफल गरी जोशीलाई कार्य वाहक दिइएको हो । उनलाई कार्य वाहक बनाउन उप मेयर जोशी लागेकी हुन् ।
