महेन्द्रनगर । बेलौरी नगरपालिकामा जेन जी युवाले उप मेयर जोगराम चौधरी तथा निमित्त प्रमुख प्रशासकीय अधिकृत झपिराज ओझा ध्यानाकर्षण पत्र बुझाएपछि बजार क्षेत्रमा अलपत्र सडक मर्मत गर्न थालिएको छ ।
नगरपालिकाले बजार क्षेत्रभित्र अलपत्र अवस्थामा रहेका सडकको मर्मत कार्य सुरु गरेको छ भने भोलिदेखि हाइवे सडकहरुको मर्मत कार्य समेत थाल्ने तयारी गरेको जनाएको छ ।
सरसफाईमा देखिएको कमजोरी पनि अब नदोहरिने नगरपालिकाले जनाएको छ । सरसफाई कर्मचारीहरूले तोकिएको समयमा नियमित काम पूरा गर्ने व्यवस्था मिलाइएको छ ।
करार कर्मचारी भर्तीमा उठेको प्रश्नलाई लिएर नगरपालिकाले भोलि विशेष रूपमा प्रतिक्रिया दिने र सबै आरोपलाई खण्डन गर्दै स्पष्ट पार्ने तयारी गरेको बताइएको छ ।
जेन जी बेलौरीका अगुवा तथा कञ्चनपुर क्षेत्र नम्बर १ का राष्ट्रिय युवा सांसद बिष्णुदत्त अवस्थीले जनताको आवाज अब बेवास्ता गर्न नसकिने बताउँदै भने, “पत्र बुझेर काम टार्ने दिन सकिएका छन्, अब यो पालिका जनताको हो, कुनै नेताको होइन ।”
