महेन्द्रनगर । कैलालीको धनगढीमा गरिएको चौथो मिनी जुनियर राष्ट्रिय उशु प्रतियोगितामा बैजनाथ माध्यमिक विद्यालय महेन्द्रनगरका चार विद्यार्थी पदक जितेर फर्किएका छन् ।
प्रतियोगितामा सविता चन्द र सम्झना कुँबरले स्वर्ण पदक जितेकी छन् । उनीहरु दुबै ३६ किलो तौल समूहमा स्वर्ण जितिन् ।
३९ किलो तौल समूहमा बन्धना नाथले रजत जितेकी छन् । माया पुजाराले ३९ किलो तौल समूहमा कास्य पदक जितेकी छन् ।
सुदूरपश्चिम खेलकूद परिषद धनगढीको तत्वावधानमा शिअ उसु क्वानले प्रतियोगिता आयोजना गरेको हो ।
प्रतियोगितामा सुदूरपश्चिमका विभिन्न जिल्लाका विद्यार्थीहरु सहभाथी थिए । बैजनाथले पदक विजेता विद्यार्थीलाई सम्मान गरेको छ ।
विद्यालय व्यवस्थापन समितिका अध्यक्ष गणेश खत्री, प्रधानाध्यापक नरेन्द्रराज जोशी, सहायक प्रधानाध्यापक तपेन्द्र प्रसाद भट्टले विद्यार्थीहरुलाई टीका लगाएर सम्मान गरे ।
विद्यालयका शिक्षक अभिभावक संघका अध्यक्ष नवराज भट्टले स्वर्ण, रजत र कास्य पदक जित्नु विद्यालयका लागि गौरबको विषय भएको बताए ।
