महेन्द्रनगर । एमालेको ११ औं महाधिवेशनमा केन्द्रीय सदस्यका लागि कञ्चनपुरका दर्जन नेता चुनावी मैदानमा होमिएका छन् । उनीहरुमा केहीले केन्द्रीय सदस्य दोहोरिने खोजेका छन् । केही पहिलो पटक केन्द्रीय सदस्य चुनाव लडि रहेका छन् ।
कर्णाली प्रदेशका पूर्व प्रदेश प्रमुख गोविन्द कलौनीदेखि सुदूरपश्चिम सरकारका पूर्व मुख्यमन्त्री राजेन्द्र सिह रावलसम्म नेता केन्द्रीय सदस्यका उम्मेदवार छन् ।
एमाले पूर्व साँसदहरु तारालामा तामाङ्ग, डा. दिपक प्रकाश भट्ट, नर बहादुर धामी, निरुदेबी पाल, सुदूरपश्चिम सरकारका भूमि व्यवस्था तथा कृषि सहकारी मन्त्री बीर बहादुर थापा केन्द्रीय सदस्य उम्मेदवार भएका छन् ।
राष्ट्रिय युवा संघका पूर्व अध्यक्ष बचन बहादुर सिह केन्द्रीय सदस्यका लागि चुनावी मैदानमा छन् । सिह कञ्चनपुर १ बाट सर्वसम्मत महाधिवेशन प्रतिनिधि भएका हुन् । उनी केन्द्रीय सदस्य खुलाबाट उम्मेदवार भएका छन् ।
विद्यार्थी राजनीतिबाट आएका सिह २०७९ को आम निर्वाचनमा कञ्चनपुर निर्वाचन क्षेत्र नं. २(१) मा काँग्रेस माओवादी गठबन्धनसित झिनो मत अन्तरले पराजित भएका थिए ।
केन्द्रीय सदस्यका उम्मेदवार डा. भट्ट कञ्चनपुर ३ बाट अत्यधिक मत पाएर महाधिवेशन प्रतिनिधि बनेका हुन् । काठमाडौको भृकुटीमा जारी एमाले महाधिवेशनको बन्द सत्रमा सोमबार डा. भट्टले सुदूरपश्चिम भूगोलबाट केन्द्रीय सदस्यमा उम्मेदवारी दर्ता गराएका हुन् ।
२०७४ को आम निर्वाचनमा कञ्चनपुर क्षेत्र नं. ३ बाट भट्ट साँसद निर्वाचित भएका थिए । एमालेमा भट्ट बौद्धिक र स्वच्छ छविको नेताका रुपमा परिचित छन् ।
केन्द्रीय सदस्यमा उम्मेदवारी दर्तापछि डा. भट्टले चुनावी प्रतिस्पर्धा आन्तरिक लोकतन्त्रको अभ्यास भएको बताए ।
‘यो पार्टीको चुनावी प्रतिस्पर्धा आन्तरिक लोकतन्त्रको अभ्यास हो, यसमा स्वस्थ र स्वच्छ हिसाबले प्रतिस्पर्धा हुन्छ’ उनले भने ।
कर्णाली प्रदेशका पूर्व प्रमुख कलौनी सहित नेताहरु तारालामा तामाङ्ग, डा.दिपक प्रकाश भट्ट, नर बहादुर धामी र बीर बहादुर थापा सुदूरपश्चिम भूगोलबाट केन्द्रीय सदस्यका उम्मेदवार छन् ।
सुदूरपश्चिम भूगोलबाट उनीहरु सहित १७ जना उम्मेदवार छन् । निर्वाचनबाट ५ जना निर्वाचित हुने छन् ।
केन्द्रीय सदस्य समावेशी थारुतर्फ संविधान सभा सदस्य कृपाराम राना केन्द्रीय सदस्यका उम्मेदवार छन् । उनी १० औं महाधिवेशनबाट केन्द्रीय सदस्य भएका थिए । २०७० को संविधान सभा सदस्य राना एमाले कञ्चनपुरको ३ नम्बर क्षेत्रका इन्चार्ज हुन् ।
केन्द्रीय सदस्य खुलामा बचन बहादुर सिह, राजेन्द्र सिह रावल, केन्द्रीय सदस्य खुला महिलामा कमला बोहरा, निरुदेबी पाल उम्मेदवार भएका छन् । उनीहरुमा सिह बाहेक सबै नेता केन्द्रीय सदस्य दोहोरिने चाहना राखेका छन् ।
सुदूरपश्चिमका पूर्व मुख्यमन्त्री रावल र पूर्व साँसद पाल दुबै एमाले पोलिटब्युरो सदस्य हुन् । पाल एमाले कञ्चनपुरकी इन्चार्ज हुन् ।
यसैबीच एमाले कञ्चनपुरका पूर्व अध्यक्ष ईश्वरी प्रसाद खरेल केन्द्रीय लेखा आयोग सचिवमा निर्विरोध भएका छन् ।
एमाले कञ्चनपुरका पूर्व अध्यक्ष खरेल यस अघि लेखा आयोग सचिवालय सदस्य थिए ।
भीमदत्त नगरपालिका १८ का खरेल २०५४ को स्थानीय निकाय निर्वाचनबाट भीमदत्त नगरपालिका(तत्कालिन महेन्द्रनगर नगरपालिका) को उप मेयर निर्वाचित भएका थिए । खरेल एमालेबाट २०४९ को स्थानीय निकाय निर्वाचनामा १८ नम्बर वडाको अध्यक्ष भएका थिए ।
