महेन्द्रनगर । शुक्लाफाँटा नगरपालिका १० का अजय बिकको लिलाम घर जोगाउन झलारीका जेन जी युवाले साथ दिएका छन् । उनीहरुले झलारीस्थित एनएमबी बैकमा तालाबन्दी गरी बैंक विरुद्ध आन्दोलन सुरु गरेका छन् ।
बैंकले जालसाची र जग्गा दलालसित मिलेर आफु्नो दुई करोडको घर लिलाम गरेको भन्दै विक परिवार दुई वर्षदेखि न्यायको खोजीमा छन् ।
जेनजी युवा संघर्ष समितिले बैंकमा तालाबन्दी गरेको हो । बैंकले बदमासी गरी विकको घर लिलाम गरेको समाचार बाहिर आएपछि जेन जी युवाले चासो देखाएका हुन् ।
बैंकसित इलाका प्रहरी कार्यालयमा छलफल गरी समस्या समाधान भएपछि शाखामा तालाबन्दी गरिएको छ । बैंकले जगा दलालसँग मिलेमतोमा घर लिलाम गरी बिचल्लीमा पारेको विक परिवारको गुनासो छ ।
बैंकले आफूलाई दिँदै नदिएको ऋण देखाएर घर लिलाम गरेको विक बताउँछनु । बिकले २०७५ मा बंैकको तत्कालिन कञ्चन डेभलपमेन्ट शाखआबाट घर कर्जामा २९ लाख ५० हजार ऋण लिएका थिए ।
बैंकले त्यहीं ऋणलाई एनएमबी बैंकको महेन्द्रनगर शाखाबाट ३७ लाख ऋण लिएर चुक्ता नगरेको भन्दै घर लिलाम गरेपछि विक परिवार न्याय खोजीमा छन् ।
बैंकले घर बाटो सिफारिश किर्ते गरी लिएको कागज शुक्लाफाँटा नगरपालिका १० बाट बनेको छ । वडा कार्यालयबाट बैंकका कर्मचारीले घर बाटो सिफारिश लिएका थिए । घर बाटो सिफारिश लिने बैंक कर्मचारी विरुद्ध किर्तेमा जाहेरी परेको छ ।
शुक्लाफाँटा नगरपालिका–१० का वडा अहध्यक्ष लाल बहादुर ऐरले बैँकले झुक्याएर घर बाटो सिफारिश लिएको भन्दै उक्त सिफारिस रद्द गर्न अर्को पत्र लेखेका छन् ।
एनएमबी बैँक कञ्चनपुरको झलारीबजार शाखाका प्रमुख दीपक कार्कीले प्रक्रियागत रूपमा घर लिलामी गरेको दाबी गरेका छन् । उनले बैँकमा तालाबन्दी गर्नुभन्दा ऋणीलाई कानुनी प्रक्रियाबाट समस्या समाधान खोज्न आग्रह गरे ।
्जेनजी सङ्घर्ष समितिका अगुवा सिजन बहादुर सिंहले जग्गाको काम गर्ने धिरेन्द्र साउँदसँग मिलेर बैँकका कर्मचारीको मिलेमतोमा घर लिलामी गरेको कारण तालाबन्दी गरेको बताए ।
उनले पीडितले न्याय नपाउन्जेलसम्म तालाबन्दी र सङ्घर्षका कार्यक्रम जारी राख्ने बताए ।
विकले शुक्लाफाटा नगरपालिका–१०, झलारी बजारमा रहेको पाँच धुरमा बनेको साढे तीन तलाको घर झलारी बजारमै रहेको एनएमबी बैँकको शाखामा धितोमा राखी २०७५ साल कात्तिक २० गते होमलोन शीर्षकमा २९ लाख ५० हजार ऋण लिनु भएको थियो ।
१५ वर्षको कर्जा भुक्तानी अवधी राखी लगेको सो ऋणको पाँच वर्षमा विभिन्न समयमा साँवा र व्याज गरी १० लाख तिरिसकेको उहाँको बैँक स्टेटमेन्टबाट देखिन्छ । तर बैँकले पत्रमा अहिलेसम्म किस्ता नै नतिरेको उल्लेख गरेको छ । विकले लिएको २९ लाख ५० हजार दिएको ऋण रकम धितो दृष्टिबन्धक लिखतमा भने ३७ लाख उल्लेख गरिएको छ । बैँकले विकलाई दिएको कर्जा स्वीकृत प्रस्तावमा भने २९ लाख ५० हजार ऋण उल्लेख छ ।
विकले ऋणका लागि आफ्नी धर्मपत्नी ज्ञानु विश्वकर्माको नाममा भएको झलारीस्थित ६१६ नम्बर कित्ताको जग्गा र त्यसमा बनेको घर धितो राखेका थिए । त्यहीं धितो रोक्का गरी बैँकले विकलाई ऋण दिएको थियो ।
बैँकबाट लिएको २९ लाख ५० ऋणलाई बैँकले महेन्द्रनगर शाखाबाट २०७५ मा ३७ लाख ऋण लिएर किस्ता तिर्न आनाकानी गरेको भन्दै २०८० मा उहाँको घर लिलाम गरेको थियो ।
बैँकले लिलामीका लागि १५ दिने सूचना निकालेको थाहा पाएपछि अजयले लिलामी नगरिदिनु भनी ३ लाख नगद र एक लाखको चेक बोकेर एनएमबी बैँकमा जाँदा पनि पैसा नबुझेको उनले बताए ।
बैँकले आफूलाई ऋण तिर्न समय नदिई जग्गा दलालसँग सेटिङ गरी घर लिलाम गरेको भन्दै विक परिवार आपत्ति जनाएको छ ।
बैकको सुदूरपश्चिम प्रदेश कार्यालयका तत्कालिन रिकभरी हेड गणेश जोशीले विकलाई साउँद र अर्का व्यक्तिसित कुरा गराएका थिए । उनीहरुमध्ये विकले साउँदसित कुरा गरेन भने अर्का व्यक्तिसित कुरा गर्दा भनाभन भएको थियो ।
विकले बैंकलाई बुझाउन लगेको किस्ता रकम जोशीले बुझ्न अस्वीकार गरी पूरै रकम चुक्ता गर्न पर्ने बताएका थिए । बिकले पूरै ऋण चक्ताका लागि एक साताको समय मागेका थिए । जोशीले त्यसपछि विकलाई साउँद र अन्य व्यक्तिसित कुरा गर्न लगाएका थिए ।
