महेन्द्रनगर । भीमदत्त नगरपालिकाको शिक्षक दरबन्दी मिलान हचुवामा गरिएको भेटिएको छ । नगरपालिकाले राहत शिक्षकलाई स्थायी शिक्षक भनेर अर्कै विद्यालयमा सरुवा गरेको पाइएको छ ।
भृकुटी माध्यमिक विद्यालयबाट बिमला भट्टलाई स्थायी शिक्षक राखेर जानकी कन्या माध्यमिक विद्यालय सरुवा गरिएको छ ।
शिक्षक भट्ट भृकुटी माविका राहत शिक्षक हुन् । शिक्षक दरबन्दी मिलानमा उनी स्थायी शिक्षक भएर जानकी सरुवा गरिएकी छन् ।
भीमदत्त नगरपालिकाले बिहीबार शिक्षक दरबन्दी मिलानको सूची सार्वजनिक गरेको थियो ।
पूर्व जिल्ला शिक्षा अधिकारी देबीदत्त भट्टको नेतृत्वमा कार्य दल बनाएर दरबन्दी मिलान गरिएको हो ।
कार्य दलले चैत ३० गते नगरपालिकालाई प्रतिवेदन बुझाएको थियो ।
नगरपालिकाले राहत शिक्षकलाई स्थायी नियुक्तिमा राखेर सरुवा गरिएपछि सामाजिक सञ्जालमा हचुवामा मिलान गरिएको भन्दै आलोचना भएको छ ।
बिहीबार शिक्षक दरबन्दी मिलान सूची सार्वजनिक भएपछि सामाजिक सञ्जालमा व्यापक आलोचना हुन थालेको छ ।
