महेन्द्रनगर । भीमदत्त नगरपालिका ६ ऐठपुरस्थित नव प्रतिभा पब्लिक सेकेन्ड्री स्कुलले भोटेकोशी त्रिशूली बाढीबाट पीडित वासिन्दालाई सहयोग गरेको छ ।
विद्यालयले विपद्बाट पीडित वासिन्दाको खोजी, उद्धार तथा राहतका लागि प्रधानमन्त्री दैबी प्रकोप उद्धार कोषमा सहयोग रकम जम्मा गरेको छ ।
विद्यालयले ५१ हजार सहयोग कोषमा जम्मा गरेको विद्यालयका प्रिन्सिपल बीर बहादुर चन्दले बताए ।
‘यो विनाशकारी बाढीको अत्यन्तै दुःखद अवस्था हो, यस्तो बेला केही न केही सहयोग हुन्छ भनेर विद्यालयबाट सहयोग गरिएको हो’ उनले भने ।
भदौ १० गते आएको विनाशकारी बाढीले रसुवा सहित १४ जिल्लामा ठूलो धनजनको क्षति गरेको छ ।
विद्यालयका प्रिन्सिपल चन्दले विपद्मा सबैले सहयोग गर्न पर्ने आवश्यकता भएको बताए ।
नव प्रतिभामा नर्सरीेदेखि कक्षा १० सम्म पठनपाठन हुने गरेको छ ।
बाढीपछि सरकारी तथा गैर सरकारी निकाय, स्थानीय तह र व्यक्तिगत रुपमा प्रधानमन्त्री कोषमा सहयोग गरिएको छ ।
यस अघि लिटिल बुद्ध एकेडेमी, इन्टरनेशनल पब्लिक स्कुल, उल्टाखामको मोडर्न मन्टेश्वरी विद्या मन्दिर, सुदूरपश्चिम विश्वविद्यालय लगायतले सहयोग गरेका छन् ।
यसैगरी भीमदत्त नगरपालिका १८ कटानस्थित महेन्द्रनगर माध्यमिक विद्यालयका शिक्षक विद्यार्थीले सहयोग गरेका छन् ।
