काँग्रेस महाधिवेशन प्रतिनिधि चन्दले छाडिन् पार्टी, भन्छिन्– पार्टीभित्रका विकृति र विसंगति स्वीकार्न सकिएन
महेन्द्रनगर । नेपाली काँग्रेसका महाधिवेशन प्रतिनिधि शारदादेवी चन्दले पार्टी परित्याग गरेकी छन् । काँग्रेसभित्र बढेको विकृति र विसंगति स्वीकार्न नसकेर उनले पार्टीको साधारण सदस्यता सहित सबै जिम्मेवारी त्यागेकी छन् ।
काँग्रेस सभापति एवम् प्रधानमन्त्री शेर बहादुर देउवा सहित काँग्रेसको प्रदेश समिति, क्षेत्रीय समिति र नगर समितिलाई उनले पार्टी परित्याग गरेको पत्र पठाएकी छन् । उनी केही समयपछि भीनपा १५ का काँग्रेस वडा सभापतिलाई भेटेर पार्टीको सदस्यता त्यागेको जानकारी गराउन लागेकी छन् ।
‘यो पार्टीका लामो समयदेखि लागि रहको जानकारी गराउँदै पार्टीभित्रका केही विकृति विंगतिलाई स्वीकार्न मलाई गाह्रो भएकाले आजका मितिदेखि नेपाली काँग्रेसका साधारण सदस्यता समेत नरहने गरी राजीखुसी पार्टी परित्याग गरी जनता र देशको हितका लागि स्वतन्त्र पूर्वक सेवा गर्न इच्छुक भएकाले पार्टी परित्याग गर्दछु’ चन्दले पार्टी सभापतिलाई पठाएको पत्रमा उल्लेख गरेकी छन् ।
काँग्रेस नेतृ चन्द अधिकारकर्मीका रुपमा परिचित छन् । उनले भीमदत्त नगरपालिका ५ वनगाउँस्थित ज्येष्ठ नागरिक, हिंसा पीडित महिला र बालबालिकाका लागि वृद्धाश्रम सञ्चालन गर्दै आएकी छन् । केही समय अघि उनले पार्टीबाट राजीनामा दिएर आगमी आम निर्वाचनमा प्रदेश साँसद लड्ने घोषणा गरेकी थिइन् ।
