महेन्द्रनगर । भीमदत्त नगरपालिका सव इन्जिनियर दिनेश भट्ट र निर्माण व्यवसायी चन्द्रसिह कार्कीबीच बढेको विवाद प्रहरी कार्यालय पुगेर मिलापत्र गरी टुङ्गिएको छ ।
जिल्ला प्रहरी कार्यालयमा निर्माण व्यवसायी कार्की सहित सव इन्जिनियर भट्ट र नगरपालिका कार्यालयका कर्मचारी सहितको छलफलमा दुबैले आ–आफ्ना कमजोरी स्वीकार गरी मिलापत्र गरेका छन् ।
सव इन्जिनियर भट्टले आफूमाथि कार्यकक्षमा व्यवसायी कार्कीले हातपात गरेको भन्दै कारवाहीको माग गर्दै प्रहरी कार्यालय पुगेका थिए । त्यस अघि नगरपालिकाकामा प्रशासकीय अधिकृत सुवास अधिकारीले दुबै जनालाई बसाएर छलफल गरी मिलापत्र गराएका थिए ।
व्यवसायी कार्कीले भने आफूले सव इन्जिनियर भट्टमाथि हातपात नगरेको दावी गरेका थिए । प्रहरी कार्यालयको छलफलमा सहभागी डिप्लोमा ईन्जिनियर्स एसोसिएशन नेपालका अध्यक्ष पवन लेखकले मिलापत्र गरिएको बताए । ‘गल्ती कमजोरी स्वीकार गरी आगामी दिनमा यस्ता व्यवहार नगर्ने गरी मिलापत्र गरिएको छ’ उनले भने ।
भीमदत्त नगरपालिका र एसोसिएसन दुबैले सव इन्जिनियर भट्टमाथि कुटपिटमा संलग्न कार्कीमाथि कारवाहीको माग गर्दै विज्ञप्ति निकालेका थिए । कार्की राखी कन्स्ट्रक्सनका सञ्चालक हुन् ।
कार्कीले ब्रह्मदेबमा निर्माण बनाएको सडकको बिल उठाउन सव इन्जिनियर भट्टले आनाकानी गरेपछि कार्कीसित विवाद भएको हो । गत आर्थिक वर्षमा निर्माण पूरा भएपछि कार्की असारदेखि सव इन्जिनियर भट्टसित आग्रह गर्दै आएका छन् ।
नगरपालिका स्रोतका अनुसार इन्जिनियरको निर्देशनमा सव इन्जिनियर भट्टले बिल उठाउन रोकेका हुन् । कार्कीले पनि कमिसन नपाउने भएपछि आफूलाई भुक्तानीमा आनाकानी गरी बखेडा झिकेको बताएका छन् ।
‘मैले नगरपालिकाबाट काम गरे बापत पैसा लिनु पर्ने छ, समान्य विवाद हुँदा ममाथि आरोप लगाईए’ उनले भने, ‘घुस खानका लागि यस्ता बखेडा झिकिएका छन्, त्यही नै हो ।’
