निर्मला पन्तको घरमा काँग्रेसका बागी सिहको निर्वाचन सम्पर्क कार्यालय, भने– अहिलेसम्म न्याय पाएको छैन, अब कहिले पाउने ?

महेन्द्रनगर । कञ्चनपुर निर्वाचन क्षेत्र नं. ३ का प्रतिनिधि सभा सदस्य दिपक बहादुर सिहले भीमदत्त नगरपालिका २ मा सम्पर्क कार्यालय खोलेका छन् । सरस्वती माध्यमिक विद्यालय नजिक दुर्गादेवी पन्तको घरमा कार्यालय खोलेका छन् ।
पन्त चार वर्ष अघि बलात्कारपछि हत्या गरिएकी निर्मल पन्तकी आमा हुन् । पन्तका हत्यारालाई अहिलेसम्म कानुनी दायरामा आउन सकेका छैन ।

पुतली चुनावी चिन्ह लिएर चुनावी मैदानमा होमिएका सिहले चार वर्षपछि पन्तले न्याय नपाएकोमा चिन्ता व्यक्त गरे ।
‘चार वर्ष भइ सक्यो, अहिलेसम्म न्याय पाएको छैन’ सम्पर्क कार्यालय उद्घाटन कार्यक्रममा उनले भने,‘अब कहिले हो न्याय पाउने ?’

२०७५ मा साउनमा भीमदत्त नगरपालिका १८ मा पन्तको शव भेटिएको थियो । पन्तका हत्यारा पत्ता लगाउन माग गर्दै महेन्द्रनगर केही दिनसम्म आन्दोलन चर्किएको थियो ।

काँग्रेसका महाधिवेशन प्रतिनिधि सिहले पन्तका हत्यारालाई कारवाही गर्न यस अघि पटक पटक माग गर्दै आएका छन् । उनले न्यायका लागि ठूलो आन्दोलनको आवश्यकता देखिएको र आफूले साथ समर्थन दिने बताए ।

पन्तको न्यायका लागि काँग्रेसले एमाले अध्यक्ष केपी शर्मा ओली नेतृत्वको सरकार विरुद्ध देशव्यापी आन्दोलन गरेको थियो । काँग्रेसले अपराधीलाई सरकारले लुकाएको आरोप लगाएको थियो । अहिले काँग्रेस नेतृत्वमा सरकार बनेपछि पन्तका हत्यारा पत्ता लगाउन सरकार वेवास्ता गरिएको छ ।

स्वतन्त्र उम्मेदवार सिहले अहिले काँग्रेस र माओवादी सरकारले पन्तको न्यायका लागि आवाज समेत उठाउन नसकेकाले सबैले सोच्नु पर्ने बेला आएको बताए । उनले पन्तकी आमा दुर्गादेवीसित भेटघाट समेत गरेका छन् ।

कञ्चनपुर ३ क प्रदेश सभा सदस्यका लागि सिफारिश सिह छलफल नगरी भागबण्डा गरिएपछि प्रतिनिधि सभा सदस्यमा बागी बनेका छन् । काँग्रेसमा २०४९ देखि सक्रिय उनी १४ औं महाधिवेशनबाट महाधिवेशन प्रतिनिधि भएका हुन् ।

स्वतन्त्र उम्मेदवार सिहले भीमदत्त नगरपालिका ६ मा पनि सम्पर्क कार्यालय खोलेका छन् । यस अघि भीमदत्त नगरपालिका ४ स्थित जानकी टोलमा निर्वाचन परिचालनका लागि कार्यालय खोलिएको थियो ।