शुक्लाफाँटामा छात्राहरुलाई विद्यालयमै आत्मरक्षा तालिम, मेयर महरा भन्छन्– तालिमले आत्मबल बढ्छ, समस्या पर्दा प्रतिकार गर्न सजिलो हुन्छ
महेन्द्रनगर । शुक्लाफाँटा नगरपालिकामा विद्यालयका छात्राहरुका लागि आत्मरक्षा तालिम सञ्चालन गरिएको छ । छात्राहरुमाथि हुने हिंसा न्यूनीकरणका लागि विद्यालयमा तालिम सञ्चालन गरिएका छन् ।
नगपालिकाको महिला तथा बालबालिका शाखा प्रमुख कमला जोशीका अनुसार कृष्ण माध्यमिक विद्यालय झलारी र बैजनाथ माध्यमिक विद्यालय कसरौलका छात्रालाई तालिम दिइएको छ ।
सरस्वती माध्यमिक विद्यालय कलुवापुर, सिद्ध बैजनाथ माध्यमिक विद्यालय बन्शाह, राष्ट्रिय माध्यमिक विद्यालय पीपलाडीमा अध्ययनरत छात्रालाई पनि आत्मरक्षा तालिम दिइने छ। ‘हामीले ६ वटा विद्यालयमा आत्मरक्षा तालिम दिन्छौं, प्रत्येक विद्यालयमा एक सयभन्दा बढी किशोरीहरुलाई आत्मरक्षा तालिम दिइरहेका छौं।’ कराँतेका सहायक प्रशिक्षक जमुना सिंह आत्मरक्षा तालिममा प्रशिक्षक छन् ।
‘आत्मबल उच्च राखेर तत्काल उम्कन सकिने गरी आक्रमण गर्ने तरिकाका विषयमा शारीरिक प्रशिक्षण दिइरहेका छौं,’ प्रशिक्षक सिंहले भनिन्। आत्मरक्षा तालिमले छात्राहरुको आत्मबल बढाउने नगर प्रमुख रण बहादुर महराले बताए ।
‘यस्ता तालिमले किशोरीहरु आत्मबल बढ्नुका साथै समस्यामा पर्दा प्रतिकार गर्न सहज हुनेछ,’ उनले भने, ‘अगामी दिनमा पनि बालबालिका तथा किशोरीको आत्मबल बढाउने खालका कार्यक्रम गर्दै जानेछौं ।’
