महेन्द्रनगर । शुक्लाफाँटा नगरपालिकाको पिपलाडी स्वास्थ्य चौकीले स्वमूल्याकनमा ९३ प्रतिशत अंक ल्याएको छ। सरकारले तोकेको मापदण्ड अनुसार स्वमूल्यांकन गर्दै ९३ प्रतिशत ल्याएको हो ।
पूर्वाधार, व्यावस्थापन, सेवा प्रवाह लगायतका आधारमा स्वमुल्यांकन गरिएको स्वास्थ्य चौकीका प्रमुख दुर्गादत्त भट्टले बताए । ‘स्वमुल्यांकनमा सय प्रतिशत पुगाउने हाम्रो लक्ष्य थियो,’ उनले भने, ‘अहिले ९३ प्रतिशत मात्रै पायौं, गत वर्ष ७८ प्रतिशत अंक पाएका थियौं।’
स्वास्थ्य चौकीको व्यवस्थापनमा सुधार गनुपर्ने दिएको उनले बताए । ‘फोहर व्यवस्थापन समस्या देखियो, त्यसलाई सुधार गर्छौ,’ उनले भने, ‘नगरपालिका र स्वास्थ्य कार्यालयबाट पनि हामीले गरेको स्वमुल्यांकनको चेकजाँच गर्न आउनु भएको थियो, उहाँहरु उत्कृष्ट छ भन्नु भएको छ ।’
स्वमुल्यांकनको समिक्षा कार्यक्रममा स्वास्थ्य कार्यालय कञ्चनपुरबाट परिवार नियोजन निरीक्षक कपिलदेव जोशी आएका थिए । नगरपालिकाबाट नगर प्रमुख रणबहादुर महरा, वडा नं. ४ का अध्यक्ष कमल ठकुल्ला लगायत कर्मचारीहरुको सहभागिता थियो । नगर प्रमुख महराले स्वास्थ्य चौकीका सम्पूर्ण कर्मचारी, चिकित्सकलाई बधाई तथा शुभकामना दिए ।
‘राम्रो गर्नु भएको छ, अझै राम्रो काम गर्नुहोस्,’ उनले भने, ‘सधैं सेवाग्राहीको सेवा ध्यान दिनुहोला, सेवा प्रभाव अझै चुस्तद्रुस्त पार्नुहोस् ।’
