महेन्द्रनगर । बेलौरी नगरपालिकाका प्रमुख प्रशासकीय अधिकृत नर बहादुर विकले जिम्मेवारी हेरफेर गरिएका दुई वडा सचिव अटेरी देखिएका छन् । उनीहरु जिम्मेवारी दिइएको वडा नगएर साविकको वडामा कामकाज गर्दै आएका हुन् ।
बेलौरी नगरपालिका कार्यालयको २०७९ पौष ७ गतेको चलानी नम्बर १२९५ र १२९७ को निर्णय अनुसार बेलौरी नगरपालिका वडा नम्बर २ का वडा सचिव श्याम कुमार रानालाई बेलौरी नगरपालिका वडा नम्बर ८ मा र वडा नम्बर ८ का वडा सचिव सन्जिव चौधरीलाई वडा नम्बर २ मा अर्को व्यवस्था नभएसम्मका लागि कामकाज गर्न खटाइएको थियो । तीन महिनासम्म उनीहरु जिम्मेवारी दिइएको वडामा नगएका हुन् ।
वडा सचिवद्वय राना र चौधरीले खटाइएको वडामा जान अटेरी गर्दा समेत प्रमुख प्रशासकीय अधिकृत विक मौन देखिन्छन् ।
दुवै जना वडा सचिव हाल साविककै वडामा काम गरिरहेका छ्न् । तर उनीहरूलाई साबिककै वडामा काम गर्न नगरपालिकाले अर्को पत्र पठाएको भने देखिदैन । यस विषयमा सोधपुछ गर्दा प्रमुख प्रशासकीय अधिकृत विकले कुनै प्रतिक्रिया दिन अस्वीकार गरेका छन् ।
बेलौरी नगरपालिकाका मेयर पोतिलाल चौधरीको पहिलो कार्यकालको बिचमा सरुवा भएका प्रमुख प्रशासकीय अधिकृत विक केही महिना अघि फेरि बेलौरी आएका हुन् ।
