प्रशासनिक झन्झट देखाउँदै उपभोक्ता समितिले असमर्थता देखाएपछि भीनपा १६ मा सबै विकास निर्माणका कार्य ठेक्कापट्टाबाट

महेन्द्रनगर । भीमदत्त नगरपालिका १६ मा उपभोक्ता समितिले प्रशासनिक झन्झट देखाएर काम गर्न नसक्ने बताएपछि विकास निर्माणका सबै कार्य ठेक्का प्रक्रियामा गएका छन् । वडाभित्रका सबै टोल विकास संस्थाको सामूहिक भेलामा उपभोक्ता समितिबाट कामकाज गर्न नसकिने निर्णय भएपछि वडाले नगरपालिकालाई ठेक्काको जिम्मा दिएको हो ।

वडामा ६ टोल विकास संस्था छन् । वडा कार्यालयले वडामा विकास निर्माण कार्यका लागि सबै टोलको भेला गरी सुझाव लिएको थियो ।

भेलामा टोल विकास समितिका पदाधिकारीले लगत सहभागिता व्यहोर्न नसकिने, भुक्तानीका लागि प्रशासनिक झन्झट व्यहोर्न पर्ने, निर्माण सामाग्री जुटाउन नसकिने लगायतका कारण देखाएर उपभोक्ता समितिले काम गर्न असमर्थता देखाएको थियो । उनीहरुले निर्माण कार्य सकिएपछि मात्रै भुक्तानी पाउने भएकाले निर्माण सामाग्री किन्न पनि समस्या हुने गरेको दुखेसो पोखेका थिए ।

वडा समिति चन्द्रकान्त जोशीले टोल विकास समितिको भेलाबाट काम गर्न नसकिने निर्णय भएपछि विकास निर्माण कार्यका लागि ठेक्का प्रक्रियामा गएको बताए ।

‘प्रशासनिक झन्झट देखाएर काम गर्न सकिदैन भनेपछि ठेक्का प्रक्रियामा गएका छौ, नगरपालिकाले त्यो सबै ठेक्का प्रक्रिया अघि बढाई सकेको छ’ उनले भने ।

वडा सचिव जोशीका अनुसार वडामा कल्भर्ट निर्माण सहित कार्यका लागि २५ लाख बजेट विनियोजन गरिएको छ । भीमदत्त नगरपालिकामा विकास निर्माण कार्यमा उपभोक्ता समितिले २० प्रतिशत लागत सहभागिता व्यहोर्न पर्ने प्रावधान छ । लगत सहभागिताको प्रावधान राखिएपछि विगतदेखि उभोक्ता समिति काम गर्न डराउँदै आएका छन् ।