प्रदेश सभा बैठकमा एमाले साँसदले भने–आन्दोलनमा हाम्रो ऐक्यबद्धता छ, तर यसबारे प्रदेश सरकारको धारणा के हो ?
महेन्द्रनगर । सुदूरपश्चिम प्रदेश सभामा प्रमुख प्रतिपक्षी दल नेकपा एमालेले कैलालीको गेटास्थित सहिद दशरथ चन्द राष्ट्रिय स्वास्थ्य विज्ञान विश्वविद्यालयको बारेमा सरकारको धारणा माग गरेको छ । सुदूरपश्चिम प्रदेश सभाको आइतबाको बैठकमा प्रदेश सभा सदस्य धर्मराज पाठकले सुदूरपश्चिम प्रदेश सरकारको धारणा माग गरेका हुन् ।
संघीय सरकारले आफ्नै नीति तथा कार्यक्रम विपरीत प्रतिष्ठानका रुपमा अघि बढाउने र एक सय श्ययाको अस्पताल सञ्चालन गर्न बजेट विनियोजन गरेपछि सुदूरपश्चिम सरकाररको धारणा माग गरिएको हो ।
पाठकले स्वास्थ्य विज्ञान विश्वविद्यालय बनाउनुपर्ने माग गर्दै प्रदेशवासी आन्दोलित भएका बेला प्रदेश सरकारले कुनै धारणा नआएको भन्दै धारणा सार्वजनिक गर्न माग गरेका हुन् ।
पाठकले सहिद दशरथ चन्द स्वास्थ्य विज्ञान विश्वविद्यालय बनाउनुपर्ने माग गर्दै भइरहेका आन्दोलनमा नेकपा एमालेको समर्थन रहेको समेत बताए ।
उनले भने, ‘गेटामा सहिद दशरथ चन्द राष्ट्रिय स्वास्थ्य विज्ञान विश्वविद्यालय बनाउनु पर्ने माग गर्दै भइरहेका आन्दोलनमा नेकपा एमालेको ऐक्यबद्धता छ । तर, यसबारे प्रदेश सरकारको धारणा के हो ?’ हामीले यसअघिको बैठकमा पनि सरकारको धारणा मागेका थियौँ। तर, अहिलेसम्म केही आएको छैन। सभामुख महोदय धारणा सार्वजनिक गर्न सरकारलाई निर्देशन गरियोस् ।’
