चौतर्फी आलोचनापछि दशरथ चन्दकी उप मेयरले मागिन माफी, विज्ञप्ति निकालेर भनिन्–जातीय समानता कायम राख्ने यात्रामा सधैं हातेमालो गर्ने प्रतिवद्धता गर्छु

महेन्द्रनगर । बैतडीको दशरथ चन्द नगरपालिकाकी उप मेयर कौशिल्या चन्दले दलित समुदायलाई विभेद हुने गरी सार्वजनिक कार्यक्रममा दिएको अभिव्यक्तिको चौतर्फी आलोचना भएपछि माफी मागेकी छन् । केही दिन अघि उनले सार्वजनिक कार्यक्रममा म ठकुरीको छोरी हुँ, दलितको हातको पानी खादिनँ, यो मेरो आफ्नो इच्छाको कुरा हो’ अभिव्यक्ति दिएकी थिइन् ।

उप मेयर चन्दको आलोचनासंगै कारवाहीका लागि राष्ट्रिय दलित आयोगले सरकारको ध्यानाकर्षण गराएको थियो । बुधबार उप मेयर चन्दले विज्ञप्ति प्रकाशित गरी आफ्नो अभिव्यक्तिले दलित समुदायमा ठेस पुग्न गएको उल्लेख गर्दै क्षमा मागेकी छन् ।

‘जातीय छुवाछुत मुक्त राष्ट्र घोषणा दिवसको अवसरमा मैले अभिव्यक्त गरेका ंअभिव्यक्तिले सिंगो दलित समुदायप्रति पर्न गएको ठेसमा क्षमायाची हुँदै नगर उप प्रमुखको हैसितयले क्षमा चाहन्छ’ उनले सार्वजनिक विज्ञप्तिमा भनिएको छ ।
उप मेयर चन्दले जातीय समानता कायम राख्ने कार्यमा सधैं हातेमालो गरेर अघि बढ्ने प्रतिवद्धता व्यक्त गरेकी छन् ।

आयोगले नेपालको संविधानको प्रस्तावनामा सबै प्रकारका जातीय तथा लैंगिक भेदभावको अन्त्य गर्ने संकल्प गरेको छ । आगामी आर्थिक वर्ष २०८०–०८१ को बजेट वक्तव्यमा सबै प्रकारका हिंसा, शोषण, विभेद र दुर्व्यवहारको अन्त्य गरिनेछ भनी सम्बोधन गरिएको स्मरण गराएको छ ।

यस्तै संविधानको धारा २४ मा जातीय छुवाछूत विरुद्धको हकमा कसैले कसैलाई धर्म, परम्परा, रीतिरिवाज वा आस्थाको आधारमा भेदभाव गर्न नपाइने व्यवस्था रहेको पनि विज्ञप्तिमा उल्लेख गरेको छ ।

यदि त्यस्तो कार्य गरेमा दण्डनीय हुने कुरा उल्लेख गरिएको र जातीय तथा अन्य छुवाछूत र भेदभाव (कसूर र सजाय) ऐन, २०६८ ले जातीय छुवाछूत र भेदभावजन्य क्रियाकलाप निजी र सार्वजनिक स्थानमा कुनै पनि बहानामा गर्न निषेध गरेको छ र दण्डनीय सामाजिक अपराध हुने उल्लेख गरिएको पनि जनाइएको छ ।

सम्बन्धित
Loading...