भीमदत्त १३ सोनापुर टोलका रावतको भारतीय राजधानी दिल्लीमा धारिलो हतियार प्रहार गरी हत्या, घर परिवारको बिचल्ली
महेन्द्रनगर । भीमदत्त नगरपालिका १३ सोनापुर टोलका कालु रावतको भारतीय राजधानी दिल्लीमा धारिलो हतियार प्रहार गरी हत्या गरिएको छ । दिल्लीको शालिमार गार्डन शिमापुरीमा आइतबार रावतको टाउको धारिलो हतियार प्रहार गरी हत्या गरिएको हो ।
मजदुरीका लागि दिल्ली शालिमार गार्डेन पुगेका उनको हत्याको कारण खुलेको छैन । उनका आफन्त सिसिटीभी फुटेजमा तीन चार जना हत्यामा संलग्न देखिएको जानकारी बाहिर आएको बताउँछन् । उनी त्यहाँ ठेला चलाउने काम गर्दै आएका थिए ।
कमजोर आर्थिक अवस्थाका रावतको हत्या गरिएपछि उनको परिवारमा सन्नाटा छाएको छ । उनका श्रीमति र पाँच सन्तान छन् ।
स्थानीयले रावत परिवारका लागि खर्च संकलन गरी दिल्ली पठाएका छन् । स्थानीय महेश भट्टले सोमबार विहान उनकी श्रीमति ज्योति सहित आमा, छोरा र काका दिल्ली गएका छन् ।
मृतक रावतका सबै सन्तान बडैपुरस्थित सिद्धनाथ माध्यमिक विद्यालयमा अध्ययनरत छन् । उनीहरुमा १५ वर्षिया खुशी ६ कक्षा , १३ वर्षिय महेश कक्षा ५ ,११ वर्षिय परी ३ कक्षा ,९वर्षिय पिकी कक्षा २ र ५ वर्षिय पल बाल विकासमा अध्ययनरत छन् ।
सिद्धनाथ माध्यमिक विद्यालय व्यवस्थापन समितिका अध्यक्ष समेत रहेका भट्टले रावतको हत्यापछि घर परिवारको बिचल्लीमा परेको बताए ।
‘यो अकल्पनीय घट्नाले गाउँ टोल शोकमा छ’ उनले भने,‘यो परिवार त्यसै त कमजोर थियो, यसले बज्रपात पारेको छ ।’
