कञ्चनपुरमा यसरी मनाइयो १६ औैं राष्ट्रिय निर्माण दिवस, विहान प्रभातफेरि र पुरस्कार वितरण, साँझ दिप प्रज्वलन
महेन्द्रनगर । निर्माण व्यवसायी संघ कञ्चनपुरले १६ औं राष्ट्रिय निर्माण दिवस मनाएको छ । प्रभातफेरि, पुरस्कार वितरण र दिप प्रज्वलन लगायतका कार्यक्रम गरी निर्माण दिवस मनाइएको छ ।
विहान बजार क्षेत्रमा प्रभातफेरि गरेपछि संघको औपचारिक कार्यक्रम गरिएको छ । कार्यक्रममा बुधबार गरिएको जिल्ला स्तरिय हाजिरी जवाफ प्रतियोगिताका विजेता टीमलाई पुरस्कार वितरण गरिएको छ ।
संघका सचिव सूर्य बहादुर चन्दका जिल्लाभरका ४४ विद्यालयले भाग लिएको प्रतियोगितामा प्रथम राष्ट्रिय मावि पिपलाडीलाई २१ हजार १ सय ११, द्वितीय लक्ष्मी मावि बागफाँटा १५ हजार १ सय ११, तृतीय बैजनाथ मावि महेन्द्रनगर ११ हजार १ सय ११ र सिद्ध बैजनाथ मावि बन्साहलाई ५ हजार १ सय ११ नगद पुरस्कार सहित ट्रफी, मेडल र प्रमाणपत्र प्रदान गरिएको जानकारी दिए ।
कार्यक्रमका प्रमुख अतिथि प्रमुख जिल्ला अधिकारी गोपाल प्रसाद अधिकारीले प्रथम, नेपाल निर्माण व्यवसायी महासंघका आमन्त्रित केन्द्रीय सदस्य प्रेम प्रकाश भट्ट लगायतले पुरस्कार प्रदान गरे ।
निर्माण व्यवसायी संघ कञ्चनपुरका अध्यक्ष निरञ्जन प्रसाद भट्टको अध्यगतामा गरिएको कार्यक्रममा प्रमुख जिल्ला अधिकारी गोपाल प्रसाद अधिकारी प्रमुख अतिथि थिए । यसैगरी साँझ संघको कार्यालयमा दिप प्रज्वलन गरिएको छ ।
