महेन्द्रनगर । राष्ट्रिय प्रजातन्त्र पार्टी कञ्चनपुरले बिहीबार गर्ने आम सभामा अध्यक्ष राजेन्द्र लिङ्देन लगायतका नेताहरु सहभागी हुने भएका छन् । राप्रपाले सब्जीमण्डी रोडस्थित पार्टी कार्यालय नजिक आम सभा गर्ने तयारी गरेको छ । त्यसका लागि मञ्च व्यवस्थापन लगायतका तयारी भई रहेको छ ।
गणतन्त्र, भ्रष्टाचार, बेथिति र धर्म निरपेक्षताको विरुद्ध राप्रपाले केन्द्रीय नेतालाई बोलाएर आम सभा गरि रहेको छ । आम सभा अघि राप्रपाले संविधान चोकमा राजा महेन्द्रको शालिक पुनस्र्थापना गर्ने तयारी पनि गरेको छ ।
राप्रपाको भीमदत्त नगर अध्यक्ष करन पालका अनुसार अध्यक्ष लिङ्देन सहित वरिष्ठ उपाध्यक्ष रविन्द्र मिश्र, महामन्त्री भुवन पाठक, प्रवक्ता ज्ञानेन्द्र बहादुर शाही लगायतका केन्द्रीय नेताले आम सभालाई सम्बोधन गर्ने छन् । यसैगरी राप्रपाका नेताहरु धर्मराज जोशी, पूर्ण बहादुर चन्द लगायतका सुदूरपश्चिम क्षेत्रका नेताहरु पनि आम सभामा सहभागी हुने नगर अध्यक्ष पालले बताए ।
नगर अध्यक्ष पालले संविधान चोकमा शालिक राख्न राजनीतिक दलहरुसंग छलफल गरी सर्बदलीय सहमति खोज्न पहल गरिएको बताए । उनले राजा महेन्द्र इतिहास भएकाले सबैको सबैको सहमति भए शालिक राखिने बताए ।
राप्रपा कञ्चनपुरले पाँच लाख ५० हजार रुपैँया खर्च गरी राजा महेन्द्रको अष्ठधातुको शालिक बनाएर महेन्द्रनगर ल्याइ सकेको छ । काठमाडौंमा बनाइएको शालिकलाई केही दिन अघि महेन्द्रनगर ल्याइएका थियो ।
