महेन्द्रनगर । सुदूरपश्चिम प्रदेशका मुख्यमन्त्री कमल शाहले लगानी सम्मेलनका लागि उद्योगपति विनोद चौधरीसित छलफल गरेका छन् ।
मुख्यमन्त्री शाह सहित भौतिक पूर्वाधार विकास मन्त्री प्रकाश, आर्थिक मामिला मन्त्री नरेश शाहीले काठमाडौंमा छलफल गरी लगानी सम्मेलनका लागि सुझाव लिएका छन् । उनले चौधरीसित सुदूरपश्चिममा लगानीका लागि आग्रह गरेका छन् ।
मुख्यमन्त्री शाहले संघीय सरकारले आवश्यक कानुन निर्माण नगरिदिँदा प्रदेश सरकारलाई काम गर्न केही कठिनाई भएपनि प्रदेश सरकारका तर्फबाट उद्योगी व्यापारीलाई लगानी गर्न कुनै अफ्ठ्यारो नपार्ने बताए ।
‘हामी अधिकारका लागि संघीय सरकारसँग लडिरहेकै छौं । जसरी हुन्छ संविधानले दिएको अधिकार प्रदेशले पाउन हामी निरन्तर संघसँग संवादमा छौं,’ उनले थपे, ‘तपाईंले व्यक्तिगत र अन्य देशभित्र र बाहिरका लगानीकर्तालाई सुदूरपश्चिममा लगानीका लागि आकर्षित गर्न सहयोग गरि दिनुस् ।’
प्रदेश सरकारले आगामी फागुन २३ र २४ गते धनगढीमा लगानी सम्मेलन गर्न लागेको छ । कांग्रेसका प्रतिनिधि सभा सदस्य उद्योगपति चौधरीले सुदूरपश्चिम अत्यन्तै सम्भावना बोकेको क्षेत्र भएपनि सरकारकै कारण पछाडि पारिएको बताए ।
