भीमदत्तले गजेन्द्र बिक्रम थापाको घर अगाडि मात्रै खोज्यो एडिबी सडक निर्माण मापदण्ड , ठेकेदारले नाली खनेर छाडेपछि निर्माण अलपत्र
महेन्द्रनगर । भीमदत्त नगरपालिकाका मेयर पदम बोगटीको दबावपछि भीमदत्त नगरपालिका १८ कटान सरस्वती टोलमा रोकिएको सडक निर्माण कार्य अझै सुरु भएको छैन ।
एडिबी ऋण अनुदानको क्षेत्रीय सहरी विकास आयोजना अन्र्तगत निर्माणाधिन सरस्वती टोलमा निर्माणाधिन सडक निर्माण कार्य गत माघ दोस्रो साता एडिबीको कन्सल्टेन्टका इन्जिनियरि गिरीश चन्दलाई दबाव दिएर रोकिएको थियो ।
इन्जिनियर चन्दले मेयर बोगटीको आग्रहमा सडक निर्माण रोकिएको टोलका वासिन्दालाई जानकारी गराएका थिए । सरस्वती टोलमा गत वर्ष सडक निर्माण सुरु भएर पूर्व र पश्चिमतिर निर्माण गरी बिचको एक सय मिटर सडक निर्माण कार्य रोकिएको छ । ठेकेदार कम्पनीले बाँकी काम पूरा गराउन नाली निर्माण सुरु गरेपछि निर्माण कार्य रोक्का गरिएको थियो ।
टोलका वासिन्दा गजेन्द्र थापाको घरसम्म नाली खनेपछि निर्माण कार्य रोकिएको छ । स्थानीयका अनुसार मेयर बोगटीका नातेदार काँग्रेस नेता सहितका स्थानीयको दबावमा एक सय मिटर क्षेत्रमा पर्ने घरका पर्खाल भत्काउनु पर्ने दबाव दिएर सडक निर्माण रोक्का गर्न लगाएका हुन् ।
सडक निर्माण सकिएको पूर्वी क्षेत्रका वासिन्दाले पर्खाल भत्काउनु पर्ने माग राखेको स्थानीय बताउँछन् । उनीहरुले आफूहरुले सडक बनाउँदा पर्खाल भत्काएकाले अरुको पनि भत्काउनु पर्ने माग गर्र्दै आएका छन् ।
सडक निर्माण रोकिएपछि टोलका वासिन्दाले भीमदत्त नगरपालिका, एडिबीको कन्सलटेन्ट र ठेकेदार कम्पनीसम्म पुगेका छन् । बुधबार गजेन्द्र बिक्रम थापा सहितले भीमदत्त नगरपालिका पुगेर नगर प्रवक्ता पदम अवस्थीलाई भेटेका छन् ।
उनीहरुले सडक निर्माण कार्य अघि बढाउन नगर प्रवक्ता अवस्थीलार्ई आग्रह गरे । ‘यता र उता दुबैतिर सडक बनेको छ, बिचमा मात्रै बन्न सकेको छैन, छिटो भन्दा छिटो सडक बनाई निर्माण अघि बढाई दिनु प¥यो’ थापाले भने,‘विना कारण काम रोकिनु राम्रो भएन ।’
मेयर बोगटीले निर्माणाधिन सडकको एक सय मिटरमा मापदण्ड अनुसार ८ मिटरको बनाउने भन्दै काम रोक्न लगाएको वासिन्दाको भनाई थियो ।
पूर्व र पश्चिमबाट बनाइएको सडकको चौडाई ७ दशमवल ६० मिटरसम्म चौडाई सडक बनाएपछि थापाको घर नजिक मात्रै मापदण्ड खोजिएको छ । केही दिन अघि नगरपालिकाले प्राविधिक पठाएर सडक नापजाँच समेत गरेको थियो ।
‘मापदण्ड अनुसार बनाउनु पर्ने थियो, सुरुमा ८ मिटर हुनु पर्ने हो, तर भएन, त्यो भन्दा कम नै छ, अहिले आएर बिचमा मात्रै मापदण्ड खोज्नुको कारण के होला, बुझि सक्नु छैन’ थापाले भने ।
टोलका वासिन्दा रन सिह भण्डारीले बुधबार नगर प्रवक्ता अवस्थीलाई सहरी विकासले निर्माणका लागि चिठी पठाई सकेको बताए पनि अझै काम सुरु हुन नसकेको बताए ।
टोलका वासिन्दासित भेटमा उनीहरुको कुरा सनुेपछि सडक निर्माण कार्यका लागि पहल भई रहेको बताए । उनले कुराकानीका क्रममा कन्सलेन्टका प्राविधिकलाई फोन गरे ।
नगर प्रवक्ता अवस्थीले कन्सलेन्टका इन्जिनियर चन्दले पछिल्लो समय फोन उठाउन छाडेको बताए ।
‘चिठी आई सकेको भनेका छन्, मैले पनि फोन गरे, हुन्छ भनेको छ’ उनले भने,‘कन्सलटेन्टका इन्जिनियरले चन्दले मेरो फोन उठाउन छाडेका छन्,अरुसित कुरा हुँदा हुन्छ भनेका छन् ।’
