भीमदत्तमा एडिबीको सडक निर्माण गञ्जागोल, मेयर काठमाडौं मस्त, उप मेयर भाषणमै व्यस्त, नगर प्रवक्ता गुनासो सुनेर हैरान
महेन्द्रनगर । भीमदत्त नगरपालिकाका १८ कटान सरस्वती टोलमा एक महिनादेखि रोकिएको सडक निर्माण कार्य सञ्चालनका लागि स्थानीय पटक पटक नगरपालिका पुगेका छन् ।
एशियाली विकास बैंक (एडिबी) ऋण अनुदान सहयोगमा निर्माणाधिन सडक सरस्वती टोलमा गत महिनामा भीमदत्तका मेयर पदम बोगटीको निर्देशनमा कन्सलटेन्सीका इन्जिनियर गिरीश चन्दले निर्माण कार्य रोक्का गरेका थिए ।
गत वर्ष सडकको पूर्वी र पश्चिमी क्षेत्रमा सडक निर्माण सुरु भएर बिचको एक सय मिटर छाडिएको थियो । पूर्वी क्षेत्रमा ढल सहित सडक निर्माण कार्य भई सकेको छ । पश्चिम क्षेत्रमा नारद पाण्डेयको घरदेखि सडक निर्माणका लागि ढल निर्माण गरिएको थियो । ठेकेदार कम्पनीले बिचको एक सय मिटर सडक निर्माणका लागि गत महिना सुरु गरेपछि नाली खनेर निर्माण कार्य रोक्का गरिएको थियो ।
कन्सलटेन्सीका इन्जिनिययर चन्दले भीमदत्तका मेयर पदम बोगटीको आग्रहमा सडक निर्माण रोकिएको वासिन्दालाई जानकारी गराएका थिए । टोलका वासिन्दा सडक निर्माण सञ्चालनका लागि भीमदत्त नगरपालिका मेयर पदम बोगटी, उप मेयर निलम लेखक जोशी, एडिबीको कन्सलटेन्सी, वडा कार्यालय, भीमदत्तका नगर प्रवक्ता र ठेकेदार कम्पनीसम्म पुगेका छन् ।
बुधबार पनि उनीहरुले नगरपालिका कार्यालय आएर भीमदत्तका नगर प्रवक्ता पदम अवस्थीलाई भेटेका छन् । स्थानीय गजेन्द्र बिक्रम थापा सहितका उनीहरुले सडक निर्माण सञ्चालन गर्न दबाव दिएका छन् । नगर प्रवक्तासित छलफल हुँदा कार्यकक्षमा पुगेकी नगर उप प्रमुख निलम लेखक जोशी केही नबोली बाहिरिएकी थिइन् । उनी नगर प्रवक्ता अवस्थीलाई महाकाली नदीको अनुगमनका लागि बोलाउन कार्य कक्ष प्रवेश गरेकी थिइन् ।
भीमदत्तका उप मेयरलाई नगर क्षेत्रको विकास निर्माण अनुगमन गर्ने जिम्मा छ । उप मेयर जोशीको वडामा एक महिनादेखि सडक निर्माण रोकिँदा उनी चुपचाप बसेकी छन् ।
भीमदत्तका मेयर बोगटीले भने स्थानीयलाई आफूले सडक निर्माण स्थलमा आउन नसक्ने जानकारी गराएका छन् । मेयर बोगटीका आफन्त काँग्रेस नेताको दबावमा उनले निर्माण रोक्का गर्न लगाका थिए । काँग्रेस महासमिति बैठकमा गएका मेयर बोगटी अहिलेसम्म फर्किएका छैनन् । उनी आइतबार मात्रै नगरपालिका आउने भएका छन् । उप मेयर जोशीले विद्यालयका वार्षिकोत्सव सहितका औपचारि कार्यक्रमलाई प्राथमिकता दिएका छन् ।
उप मेयर जोशीलाई सडक निर्माण स्थलमा आउन स्थानीयले पटक पटक आग्रह गरेका छन । टोलका वासिन्दा थापाले उप मेयरलाई आउन आग्रह गर्दा विभिन्न वहाना गरेर छल्ल खोजेको बताए । ‘यो सडकको निर्माण रोकेपछि धेरै पटक आउन भन्यौ, कहिले के, कहिले के भनेर बहाना गरिएको छ’ उनले भने ।
गत महिना थापाका घरको गेटसम्म नाली खनेपछि निर्माण रोकिएको थियो । थापा सहितका स्थानीयको पर्खाल भत्काउनु पर्ने नियत राखेर केही स्थानीयले सडक निर्माण रोक्का गर्न लगाएका हुन् ।
आफ्नो घर अगाडिका सडक निर्माण भएपछि उनीहरुले सडक निर्माणको मापदण्ड अनुसार ८ मिटर हुनु पर्ने माग राखेर नगरपालिका र प्रशासन कार्यालयमा निवदेन दिएका छन् । उनीहरुको घर अगाडि भने मापदण्ड मिचेर सडक निर्माण गरिएको छ ।
उनीहरुले सडक निर्माण कार्य अघि बढाउन नगर प्रवक्ता अवस्थीलार्ई आग्रह गरे । ‘यता र उता दुबैतिर सडक बनेको छ, बिचमा मात्रै बन्न सकेको छैन, छिटो भन्दा छिटो सडक बनाई निर्माण अघि बढाई दिनु प¥यो’ थापाले भने,‘विना कारण काम रोकिनु राम्रो भएन ।’
पूर्व र पश्चिमबाट बनाइएको सडकको चौडाई ७ दशमवल ६० मिटरसम्म चौडाई सडक बनाएपछि थापाको घर नजिक मात्रै मापदण्ड खोजिएको छ । केही दिन अघि नगरपालिकाले प्राविधिक पठाएर सडक नापजाँच समेत गरेको थियो ।
‘मापदण्ड अनुसार बनाउनु पर्ने थियो, सुरुमा ८ मिटर हुनु पर्ने हो, तर भएन, त्यो भन्दा कम नै छ, अहिले आएर बिचमा मात्रै मापदण्ड खोज्नुको कारण के होला, बुझि सक्नु छैन’ थापाले भने ।
टोलका वासिन्दा रन सिह भण्डारीले बुधबार नगर प्रवक्ता अवस्थीलाई सहरी विकासले निर्माणका लागि चिठी पठाई सकेको बताए पनि अझै काम सुरु हुन नसकेको बताए ।
टोलका वासिन्दासित भेटमा उनीहरुको कुरा सनुेपछि सडक निर्माण कार्यका लागि पहल भई रहेको बताए । उनले कुराकानीका क्रममा कन्सलेन्टका प्राविधिकलाई फोन गरे । नगर प्रवक्ता अवस्थीले कन्सलेन्टका इन्जिनियर चन्दले पछिल्लो समय फोन उठाउन छाडेको बताए ।
‘चिठी आई सकेको भनेका छन्, मैले पनि फोन गरे, हुन्छ भनेको छ’ उनले भने,‘कन्सलटेन्टका इन्जिनियरले चन्दले मेरो फोन उठाउन छाडेका छन्,अरुसित कुरा हुँदा हुन्छ भनेका छन् ।’
