महेन्द्रनगर । कृष्णपुर नगरपालिकाका मेयर हेमराज ओझाले सामुदायिक विद्यालयका प्रधानाध्यापकहरुको भत्ता बढाएका छन् । कृष्णपुर नगरपालिकाको १५ औं नगर सभाबाट आगामी आर्थिक वर्ष २०८१÷०८२ का लागि भत्ता रकम दुई सय प्रतिशत वृद्धि गर्ने निर्णय गराएका हुन् ।
सामुदायिक विद्यालयका प्रधानाध्यापकलाई हाल पाँच सय भत्ता दिने गरिएको छ । कृष्णपुरमा ३३ सामुदायिक विद्यालय छन् । कृष्णपुरका मेयर ओझाले प्रधानाध्यापकको भत्ता रकम थोरै भएकाले वृद्धि गरिएको बताए ।
यसैगरी नगर सभाबाट विद्यालयमा छात्राबास सञ्चालन, अंग्रेजी माध्यममा पठनपाठन हुने विद्यालयलाई आर्थिक सहयोग गर्ने लगायतका शिक्षा सम्बन्धि कार्यक्रम सञ्चालनका लागि बजेट विनियोजन गरिएको मेयर ओझाले जानकारी दिए ।
नगर सभाबाट आगामी आर्थिक वर्षका लागि ९७ करोड ५ लाख ६० हजारको बजेट पारित गरिएको छ । आगामी वर्ष नगरपालिकाको आन्तरिक आम्दानी ६ करोड पुगाउने लक्ष्य राखिएको छ ।
नगर सभामा मेयर ओझाले नीति तथा कार्यक्रम र उप मेयर द्रोपती रानाले बजेट प्रस्तुत गरेकी हुन् ।
