महेन्द्रनगर । सुदूरपश्चिम प्रदेशका पूर्वमुख्यमन्त्री तथा नेकपा (एमाले) संसदीय दलका नेता राजेन्द्र सिंह रावलले बिहीबार भीमदत्त नगरपालिका–१, भासीस्थित जेसिज माध्यमिक विद्यालयमा स्थापना गरिएको सूचना तथा सञ्चार प्रविधि (आइसिटी) प्रयोगशालाको उद्घाटन गरेका छन् ।
सुदूरपश्चिम प्रदेश सरकार, सामाजिक विकास मन्त्रालयको आ.व. २०८२÷८३ को वार्षिक बजेटअन्तर्गत विनियोजित १० लाख रुपैयाँको लागतमा विद्यालयमा आइसिटी स्थापना गरिएको हो ।
विद्यालयका प्रधानाध्यापक लक्ष्मण गिरीका अनुसार पूर्वमुख्यमन्त्री रावलको पहलमा उक्त बजेट विनियोजन भएको हो। आइसिटी प्रयोगशाला स्थापनापछि विद्यार्थीको सिकाइलाई प्रविधिमैत्री बनाउन तथा डिजिटल माध्यमबाट अध्ययन–अध्यापन गर्न सहज हुने उनले बताए ।
प्रयोगशालामा कम्प्युटर, ल्यापटप, स्मार्ट बोर्ड लगायतका डिजिटल सामग्री राखिएका छन्। उद्घाटन समारोहको सञ्चालन शिक्षक खेमलाल घिमिरेले गरेका थिए ।
यसैबीच, पूर्वमुख्यमन्त्री रावलले बिहीबार नै महेन्द्रनगरस्थित सार्क स्कुलमा ‘सुदूरपश्चिमको इतिहास’ विषयमा अनुशिक्षण समेत दिएका छन् ।
विद्यार्थीलाई सुदूरपश्चिमको ऐतिहासिक तथा सांस्कृतिक पक्षबारे जानकारी गराएका रावलका स्वकीय सचिव राज बहादुर चन्दले बताए ।
