महेन्द्रनगर । सुदूरपश्चिम प्रदेश सरकारले एक वर्षमा प्रदेशमा ३ सय ७८ हेक्टर जमिनमा सिँचाइ सुविधा विस्तार गरेको छ । प्रदेश सरकारले गत आर्थिक वर्ष २०८१÷८२ मा एक हजार ५४७ साना सिँचाइ आयोजनामार्फत सिँचाइ सुविधा विस्तार गरेको हो ।
यसैगरी, प्रधानमन्त्री कृषि आधुनिकीकरण परियोजना अन्तर्गत बैतडीमा १०० रोपनी र दार्चुलामा १२.५ हेक्टर क्षेत्रफलमा आलुखेती विस्तार गरिएको छ ।
डोटीमा सुन्तला, बाजुरामा ४.१६ हेक्टर क्षेत्रफलमा ओखरखेती विस्तार भएको जनाइएको छ । डडेल्धुरामा २५० वर्ग किलोमिटर र कञ्चनपुरमा ४० हेक्टर जमिनमा तरकारी खेती विस्तार गरेको प्रदेश सरकारद्वारा सार्वजनिक गरिएको एक वर्षको कार्य प्रगति विवरणमा उल्लेख छ ।
कैलालीमा तरकारी बीउ, कञ्चनपुरमा ४० हेक्टरमा तरकारी खेती र बझाङमा तरकारी, आलु गरी नौ वटा ब्लक स्थापना भएको प्रदेश सरकारले जानकारी दिएको छ।
यसैगरी, अछाममा तीन हेक्टर, बझाङमा १५ हेक्टर, बैतडीमा नौ हेक्टर गरी २५ हेक्टर जमिनमा सुन्तला खेती प्रवद्र्धन गरिएको छ। यस्तै, अछाममा चार, दार्चुलामा एक गरी पाँच हेक्टर जमिनमा कागती बगैचा स्थापना गरिएको छ ।
प्रदेश सरकारले एक वर्षको अवधिमा प्रदेशका १५१ कृषकलाई कृषि कर्जा अनुदान प्रदान गरेको छ । कृषि क्षेत्रको उत्पादन र उत्पादकत्व वृद्धि गर्ने उद्देश्यले भूमि, व्यवस्था, कृषि तथा सहकारी मन्त्रालयमार्फत सरकारले किसानलाई कृषि कर्जा अनुदान प्रदान गरेको हो । आफ्नो कार्यकालको एक वर्षको अवधिमा प्रदेश सरकारले ९७ लाख कृषि कर्जा अनुदान किसानलाई दिएको मुख्यमन्त्री कमलबहादुर शाहले बताए ।
यसबाट प्रभावित भएर कृषकहरुले कृषि व्यवसायमा २३ करोड ४७ लाख रुपियाँ लगानी गरेको उनको भनाइ छ । कृषि क्षेत्रको आधुनिकीकरणका लागि एक वर्षको अवधिमा सरकारले ७४ थान पावरटिलर, ४७९ थान मिनी टेलर, चार वटा मल्टिक्रप थ्रेसर, ८९ वटा कर्न सेलर किसानलाई वितरण गरेको छ ।
यसैगरी, ३० वटा कम्बाइर राइस मिल, २४५ वटा स्यालो ट्युबबेल, १४ वटा धान थ्रेसर, सात वटा मिनी थ्रेसर, २५ वटा रोटाभेटर, १४ वटा रिपर र सात वटा उखु पेल्ने मेसिन तथा उपकरणहरु किसानलाई दिइएको छ ।
प्रदेशका पहाडी जिल्लाहरुमा जलवायुमैत्री नमुना गाउँ र प्राङ्गारिक मिसन कार्यक्रम सञ्चालन गरी कृषकमाझ जलवायु अनुकुलित प्रविधि पु¥याएको जनाइएको छ ।
साभार : गोरखापत्र अनलाइन
