महेन्द्रनगर । बेलौरी नगरपालिकाका मेयर पोतिलाल चौधरी दोस्रो पटक मेयर निर्वाचित भएपछि शिक्षा सम्बन्धी ऐनका प्रावधान कार्यान्वयनका लागि अघि बढेका छन् । पाँच वर्ष नगर शिक्षा समितिको नेतृत्व गरि सकेका उनी यस सुरुदेखि ऐन कार्यान्वयनमा सक्रियता देखाउन थालेका छन् ।
शिक्षा ऐन २०२८ (संशोधन सहित ) १६ ग १ मा विद्यालयलाई सुरक्षित क्षेत्रको कायम गर्नु पर्ने उल्लेख छ । त्यस ऐनको प्रावधानका आधारमा नगरपालिकाले विद्यालयमा विद्यार्थीहरुलाई भय रहित र विद्यार्थीमैत्री वातावरणमा शिक्षण सिकाई गराउनु व्यवस्था मिलाउन नगरपालिका सबै विद्यालयमा पत्राचार गरेको छ ।
बेलौरी नगरपालिकाका प्रमुख प्रशासकीय अधिकृत सुशिला लेखकले बुधबार सबै विद्यालयलाई ऐनमा उल्लेखित प्रावधान कार्यान्वयनका लागि भनेर पत्र पठाएकी छन्.।
प्रमुख प्रशासकीय अधिकृत लेखकले पत्र पठाएपछि विद्यालयमा शिक्षकहरु आश्चर्यमा परेका छन् । उनीहरु शिक्षण संस्था शान्ति पूर्वक सञ्चालन भइ रहेका बेला नगरपालिकाले ऐन कार्यान्वयनका पठाएको पत्रले सशंकित हुन पुगेका छन् ।
‘विद्यालयमा त्यस्तो अशान्ति त केही छैन, नगरपालिकाले किन यो पत्र पठायो होला, केही थाहा छैन’ नगपालिकाका एक सामुदायिक विद्यालयका शिक्षकले भने,‘यो पत्रले त झ कतै अशान्त पो छ कि भन्ने शंका लाग्यो, कनि यो पत्र पठायो होला, ऐन कार्यान्वयन गर्ने हो भने अहिलेसम्म किन मतलब नगरेका होला त ।’
पाँच वर्षसम्म मेयर चौधरी पाँच वर्षसम्म आफैं नगर शिक्षा समितिको अध्यक्ष भएका छन् । दोस्रो पटक जितेर आएपछि उनी ऐन कार्यान्वयनका लागि अघि बढेका छन् । चुनाव जिते पनि चौधरीले पाँच वर्षे कार्यकालमा नगरपालिकाको प्रशासन लथालिङ्ग बनेको थियो ।
पाँच वर्षमा सबैभन्दा बढी कार्यालय प्रमुख फेरिएर उनले नयाँ रेकर्ड नै बनाएका छन् । उप सचिव दरबन्दीका प्रमुख प्रशासकीय अधिकृतले आउनै नमानेपछि अहिले प्रशासकीय अधिकृतलाई प्रमुख प्रशासकीय अधिकृतको जिम्मेवारी दिएर कार्यालय सञ्चालन गरिएको छ ।
नगरपालिकाका शिक्षा शाखाका उप सचिवले समेत प्रमुख प्रशासकीय अधिकृत बन्न नमान्दा प्रशासकीय अधिकृत सुशिला लेखकलाई प्रमुखको जिम्मेवारी दिइएको छ । उनी नगरपालिकाकी सूचना अधिकारी पनि हुन् ।
