महेन्द्रनगर । पेन्सन आउने बेला सशस्त्र प्रहरीका वरिष्ठ हवल्दार नरेश सिंह साहु जेल पुगेका छन् । दार्चुलाको महाकाली नगरपालिका–२ मुल्ला घर भएका साहु ४४ नम्बर गण मुख्यालय खलंगाभित्रको रासनभत्ता प्रकरणलाई मिडियामा ल्याउँदा जेल पुगेका छन् ।
२०६० वैशाखदेखि सशस्त्र प्रहरीमा कार्यरत उनी एक वर्षपछि पेन्सन जाने तयारीमा थिए । उनि एक वर्षदेखि दार्चुलामा थिए । उनले पर्वत दरबन्दी भए पनि घर व्यवहार मिलाउनुपर्ने भएकाले दार्चुलामा काज मिलाएका थिए ।
स्थानीय निर्वाचनको बेला नौगाड गाउँपालिकाका निर्वाचन अधिकृतको अंगरक्षक भएर खटिएका नरेशले गाउँपालिका केन्द्रमा भेटिएका एक जना स्थानीय पत्रकारसँग सशस्त्र प्रहरी भित्रको बेथितिबारे प्रसंगवश कुरा कोट्याएका थिए । सशस्त्र प्रहरी भित्रको बेथिति उजागर भएपछि केही सुधार हुने आशमा रहेका नरेश अहिले उल्टै सशस्त्रको फन्दामा परेका छन् ।
विश्वासमा उपलब्ध गराएको दैनिक हाजिरी विवरणबारे पत्रकारले नै सशस्त्र प्रहरीलाई सघाउ पुग्ने गरी लिखित बयान गरिदिएपछि नरेशका लागि यो प्रकरण प्रत्युत्पादक भएको छ ।
जेठ ३० गते नरेशलाई दार्चुलाबाट धनगढीको अत्तरियास्थित बाहिनी हुँदै सशस्त्रको हेडक्वार्टर हल्चोक पु¥याइ जेल पठाइएको छ । नरेशका एक छोरा र एक छोरी छन् ।
दाइको मृत्यु भएपछि तिनका ३ सन्तानको पालनपोषण पनि नरेशले नै गर्दै आएका छन् । जागिरले घर परिवार पाल्दै आएका नरेशलाई जन्मकैदको माग दाबी सहित मुद्दा चलाइएको छ । पेन्सन आउनेबेला जन्मकैदको मुद्दा लागेपछि घर परिवारलाई संकट परेको उनकी श्रीमती दुर्गाले बताइन् ।
