महेन्द्रनगर । संविधान सभा सदस्य दुर्गा खुना सहितका माओवादी केन्द्रका नेताहरु एमाले प्रवेश गरेका छन् । महेन्द्रनगर स्मारकमा गरिएको जन सभा तथा पार्टी प्रवेश कार्यक्रममा उनीहरु एमाले आएका हुन् । एमाले अध्यक्ष केपी शर्मा ओलीले उनीहरु सबैलाई खादा लगाएर पार्टीमा स्वागत गरेका छन् ।
एमाले आउनेमा संविधान सभा सदस्य खुना, संविधान सभा सदस्यका उम्मेदवार मोहन गिरी, राम बहादुर गुरुङ्ग, शंकरदत्त जोशी, कल्पना गिरी, सीता डगौरा, मोहन पन्त, डम्बर विष्ट, घाँसीराम राना लगायतका छन् । उनीहरुमध्ये गिरी २०७० को संविधान सभा सदस्य निर्वाचनमा तत्कालिन कञ्चनपुर क्षेत्र नं. ४ बाट लडेका थिए । जोशी माओवादी केन्द्र सम्बद्ध कर्मचारी संगठनका केन्द्रीय उपाध्यक्ष हुन् ।
बेदकोट नगरपालिका ५ धरमपुरका राना कमैया आन्दोलनका अगुवा हुन् । उनीहसंगै माओवादी केन्द्रबाट संविधान सभा सदस्य हरिश ठकुल्ला सहितका नेता कार्यकर्ता पनि एमालेमा आउने तयारी गरिएको थियो ।
माओवादी केन्द्रले छलफलका लागि काठमाडौं बोलाएपछि उनीहरु काठमाडौं गएका छन् । माओवादी केन्द्रका शीर्ष नेताले उनीहरुसित छलफल गरेका छन् ।
