महेन्द्रनगर । प्रधानमन्त्री शेरबहादुर देउवाकी पत्नी तथा कांग्रेस नेत्री आरजु राणा देउवाले फेरि अर्को विवादास्पद अभिव्यक्ति दिएकी छन् । गृहजिल्ला डडेल्धुरामा प्रधानमन्त्री देउवालाई भोट माग्दै उनले हेलिकोप्टर चढेर आउन सक्ने व्यक्तिलाई भोट हालेर जिताउन आग्रह गरेकी हुन् ।
केही साता अघि उनले ‘आफूहरुका कारण डडेल्धुरा जादु जस्तो जिल्लामा रुपान्तरण भएको र यहाँका मानिसहरुले ‘खुल्जा सिमसिम’ भन्दा बालुवाटारका ढोका खुलेर सत्ता नजिक भइने’ आशय प्रकट गरेकी थिइन् ।
शुक्रबार गन्यापधुरा गाउँपालिकाको चुनावी सभालाई सम्बोधन गर्दै उनले फेरी भनिन्, ‘यो गाउँठाउँको विकास गर्ने र व्यवस्थालाई अगाडि सारेर संविधानको रक्षा हामीले गर्नुपर्छ । त्यसैले हामी आज जसरी हेलिकोप्टर चढेर आयौं। आजभन्दा १०÷१५ वर्ष अगाडि यहाँ हेलिकोप्टरमा उडेर आउनसक्ने क्षमता बनाउनसक्ने मान्छेलाई तपाईंहरुले जिताउनुस् ।’
प्रधानमन्त्री देउवासहित आरजु पनि चुनावी कार्यक्रमका लागि गृहजिल्ला डडेल्धुरामा छिन् । यसअघि पनि उनले कांग्रेसलाई जिताएमा वैदेशिक रोजगारीका लागि फ्रि भिसा फ्रि टिकट दिइने र कांग्रेसले जित्ने ठाउँमा मात्रै बजेट पठाउनेलगायत विवादस्पद अभिव्यक्ति दिएकी थिइन् ।
