प्रधानमन्त्री देउवाको अनिच्छाले मझगाउँ विमानस्थल सञ्चालन कार्य रोकिएको निवर्तमान साँसद भट्टको दुखेसो, भन्छन्– प्रधानमन्त्री आफैं रक्षामन्त्री भएकाले सानो निर्णय गर्दा पनि काम अघि बढ्न सक्थ्यो
महेन्द्रनगर । नेकपा एमालेका निवर्तमान साँसद डा. दिपक प्रकाश भट्टले प्रधानमन्त्री शेर बहादुर देउवाको अनिच्छाले मझगाउँ विमानस्थल सञ्चालन कार्य रोकिएको बताएका छन् । उनले प्रधानमन्त्री देउवा आफैं रक्षामन्त्री भएकाले सानो निर्णय गर्दा पनि विमानस्थल निर्माण कार्य अघि बढ्ने उल्लेख गरे ।
‘नेपाली सेनाले विमानस्थलको केही भूभाग कब्जा गरेको छ’ उनले भने ‘प्रधानमन्त्री देउवाले नै समालेको रक्षा मन्त्रालयले सानो निर्णय गरि दिए यसको काम अघि बढ्थ्यो तर त्यो उनले र नेपाली कांग्रेसलाई विकासको काम अघि बढाउन चाहेको छैन् ।’
अघिल्लो निर्वाचन जितेपछि साँसद भट्टले विमानस्थल निर्माण कार्य अघि बढाएका हुन् । सुदूरपश्चिम प्रदेश सरकार र स्थानीय तहको साझेदारीमा सुरु गरिएको काम सेना मातहतको रत्न वाटिकामा तारबार गरेपछि रोकिएको छ ।
सेनाले शाहीकालमा विमानस्थल जग्गा गैर कानुनी रुपमा आफ्नो नाममा दर्ता गरी जग्गाधनी पूर्जा लिएको छ । यस अघि विमानस्थल पुनःसञ्चालनका लागि सेना सहित छलफल गरी अघि बढाईको थियो ।
निवतर्तमान साँसद भट्टले एमालेले जिते महाकाली र जोगबुढामा पक्की तटबन्धसँगै पुल पनि निर्माण गरिने बताए । उनले एमाले नेतृत्व सरकार बनेमात्रै जनता सुखी हुने उल्लेख गर्दै प्रधानमन्धी शेर बहादुर देउवाले हेलिकप्टरबाट आए पनि अहिलेसम्म क्षति अनुसार राहत पाउन नसकेको बताए ।
पछिल्ला पाँच वर्षमा नगरलाई विकास र आर्थिक केन्द्रको रुपमा जोड्ने काम भएको बताए । उनले महाकाली पुलको समयमै निर्माण कार्य सम्पन्न गरी दोधरा चाँदनी सुक्का बन्दरगाह निर्माणको काम अघि बढेकोले निकट भविष्यमा यो क्षेत्र देशकै ठूलो व्यापारिक नाकाको रुपमा विकसित हुने बताए ।
उनले लामो समयदेखि अवरुद्ध रहेका महाकाली करिडोरको कामलाई दोधराचाँदनीसँग जोडेर काम सुरु गरिएको पनि उनले बताए । ठूला विकासका आयोजना सञ्चालनका लागि एमालेलाई नै जिताउनु अपरिहार्य रहेको उनको भनाई छ ।
