महेन्द्रनगर । कृषक विकास समिति कञ्चनपुरले बेदकोट नगरपालिकाका किसानलाई बेमौसमी तरकारीका बिऊ वितरण गरेको छ । बेदकोट नगरपालिका वडा नं. ७ को सहयोगमा सोही वडाका महिला कृषक समूहलाई उन्नत जातको बिऊ दिइएको छ ।
बेदकोट नगरपालिका ७ को भुडा र मन्दिरपुरका कृषक समूहलाई बितरण गरिएको छ । समितिका अध्यक्ष राम सिह पुजाराको अध्यक्षतामा गरिएको कार्यक्रममा वडा अध्यक्ष थानेश्वर प्रसाद भट्ट प्रमुख अतिथि थिए । कार्यक्रमका प्रमुख अतिथि वडा अध्यक्ष भट्टले किसानलाई लौका, काँक्रो, करेला, गोबी, भिन्टी लगायतका तरकारीको बिउ हस्तान्तरण गरे ।
समितिका अध्यक्ष पुजाराले समितिले किसानहरुको घरदैलोमा पुगेर विभिन्न किसिमका तालिम सञ्चालन गर्दै आएको र बिऊ विजन वितरण गर्दै आएको उल्लेख गर्दै आगामी दिनमा स्थानीय, प्रदेश र संघ सरकारसित समन्वय र सहकार्य गरी जाने बताए ।
भारतीय बजारबाट आउने तरकारी आयात निरुत्साहित गर्ने र स्थानीय उत्पादन बढाएर किसाको आर्थिक उन्नतिका लागि संस्थाले कार्यक्रम सञ्चालन गर्दै आएको अध्यक्ष पुजाराले उल्लेख गरे ।
कार्यक्रममा वडा सदस्यहरु सुवास मल्ल, तारा डगौरा, समितिका कार्यक्रम संयोजक शेर बहादुर चन्द, कृषि प्राविधिक माधव पन्त लगायतका अगुवा किसान सहभागी भएका छन् ।
