महेन्द्रनगर । भीमदत्त नगरपालिकाको १९ औँ नगरसभा अधिवेशनमा बुधबार आगामी आर्थिक वर्ष २०८३÷०८४ का लागि नीति, कार्यक्रम तथा वार्षिक बजेट पेश गरिएको छ ।
नगर सभामा प्रस्तुत नीति, कार्यक्रम तथा बजेटमाथि सदस्यहरुले अध्ययन गरी सुझाव पेश गरेपछि असार १३ गते पारित हुने जानकारी दिइएको छ ।
भीमदत्तका मेयर पदम बोगटीले नगर सभा अध्यक्षता गरे । नगर सभामा २ अर्ब १३ करोड २५ लाख ७६ हजार रुपैँया बराबरको अनुमानित बजेट पेश गरिएको छ ।
बजेटमा संघीय सरकार, सुदूरपश्चिम प्रदेश सरकार तथा नगरपालिकाको आन्तरिक स्रोतबाट प्राप्त हुने राजस्वलाई आधार मानी विभिन्न विकास तथा सेवा प्रवाहका कार्यक्रम समेटिएका छन् । नगरपालिकाले आगामी आर्थिक वर्षमा रु. ३६ करोड आन्तरिक आय संकलन गर्ने लक्ष्य राखेको छ ।
संघीय सरकारबाट वित्तीय समानीकरण अनुदान तर्फ २४ करोड २४ लाख, राजस्व बाँडफाँटबाट १७ करोड ८८ लाख ३७ हजार, सशर्त अनुदानबाट ५६ करोड ४० लाख र विशेष अनुदानबाट ७४ लाख प्राप्त हुने अनुमान गरिएको छ ।
त्यसैगरी सुदूरपश्चिम प्रदेश सरकारबाट वित्तीय समानीकरण अनुदानतर्फ २ करोड ४२ लाख ५९ हजार, सशर्त अनुदानबाट ११ करोड ३५ लाख, राजस्व बाँडफाँटबाट ६५ लाख ८० हजार प्राप्त हुने अपेक्षा गरिएको छ । साथै सामाजिक सुरक्षातर्फ ५८ करोड, सडक बोर्ड नेपालमार्फत ७० लाख तथा नगद मौज्दात ४ करोड, समपुरक ३० लाख समेत बजेट स्रोतमा समावेश गरिएको छ । बजेटमा सडक पूर्वाधार, शिक्षा, स्वास्थ्य, कृषि, खानेपानी, सरसफाइ, रोजगार प्रवद्र्धन, सामाजिक सुरक्षा तथा नगरको समग्र विकासलाई प्राथमिकतामा राखिएको नगरपालिकाले जनाएको छ ।
नगर प्रमुख बोगटीले प्रस्तुत बजेटले नगरवासीको जीवनस्तर उकास्ने, आधारभूत सेवा सुदृढ गर्ने तथा दिगो विकासका लक्ष्य हासिल गर्न सहयोग पुग्ने विश्वास व्यक्त गरे । उनले नगरसभाका सदस्यहरूबाट प्राप्त हुने सुझावलाई समेटेर बजेटलाई अझ प्रभावकारी बनाइने बताए ।
प्रस्तुत नीति, कार्यक्रम तथा बजेटमाथि नगरसभा सदस्यहरूले छलफल गरी सुझाव पेश गर्नेछन् । सुझाव समेटिएपछि आगामी असार १३ गते बस्ने नगरसभा बैठकबाट बजेट पारित गरिने जनाइएको छ । नगरसभामा विषयगत समितिहरुले वार्षिक प्रगति प्रतिवेदन समेत पेश गरेका छन् ।
