महेन्द्रनगर । पूर्व गृहमन्त्री रमेश लेखकले महाकाली नदीको झोलुङ्गे पुल भत्किँदा आफ्नो ठूलो सपना भत्किएको अनुभूति भएको बताएका छन् ।
गत असोज १४ गते महाकाली नदीमा आएको बाढीले क्षतिग्रस्त बनाएको उक्त ऐतिहासिक पुलको शुक्रबार बिहान स्थलगत अनुगमन गर्दै उनले यस्तो बताएका हुन् ।
पुल निर्माणको योजनादेखि सम्पन्न हुँदासम्म आफू प्रत्यक्ष संलग्न रहेको स्मरण गर्दै पूर्वगृहमन्त्री लेखकले दोधाराचाँदनीलाई सिङ्गो देशसँग जोड्ने यो पुल सामान्य आवतजावतको साधन मात्र नभई राष्ट्रकै गौरवपूर्ण सम्पदा भएको उल्लेख गरे ।
यस पुलले विगतमा नेपाली भूमि जान भारतीय बाटो प्रयोग गर्नुपर्ने बाध्यता अन्त्य गरेको चर्चा गर्दै उनले ऐतिहासिक महत्त्व बोकेको यस संरचनाको यथाशीघ्र पुनर्निर्माण र संरक्षणमा जुट्न सरकारको गम्भीर ध्यानाकर्षण गराए ।
उनले क्षतिग्रस्त पुलको पुनर्निर्माणका लागि आफ्नो तर्फबाट आवश्यक सम्पूर्ण पहल गर्ने प्रतिबद्धतासमेत व्यक्त गरेका छन् ।
