माया हत्याकाण्डमा नेकपा बहुमत भन्यो– संलग्नलाई पक्राउ गरी कानुनी दायरामा ल्याउ, पीडित परिवारलाई क्षतिपूर्ति देऊ
महेन्द्रनगर । नेकपा बहुमत बैतडीले माया लुहार हत्याकाण्डमा संलग्नलाई पक्राउ गरी कानुनी दायरामा ल्याउन र पीडित परिवारलाई क्षतिपूर्ति दिन सरकारसित माग गरेको छ । बहुमतले विज्ञप्ति प्रकाशित गरी राजनीतिक संरक्षणमा हत्यामा संलग्नलाई जोगाउन खोजिए आन्दोलनमा उत्रिने चेतावनी दिएको छ ।
बैतडीको पञ्चेश्वर गाउँपालिका ४ की २१ वर्षिया माया लुहारको मंगलबार साँझ शिवनाथ गाउँपालिकाको शिव मन्दिर नजक घाँटी रेटेर हत्या गरिएको थियो । उनीसंगै भएकी उनकी भदै १५ वर्षिया नेहा लुहारको घाँटीमा चक्कु प्रहार गरी हत्या गर्ने प्रयास गरिएको थियो । लुहार परिवारले हत्यापछि शिवनाथ ६ का सशस्त्र प्रहरी भरत कोलीका नाममा किटानी जाहेरी दिएका छन् । घर विदामा आएका कोही बुधबार शव भेटिएपछि फरार भएका छन् ।
बहुमतका जिल्ला इन्चार्ज बासुदेब र संयोजक देबद्वारा हस्ताक्षरित विज्ञप्तिमा भनिएको छ, ‘छात्रा मायाको हत्या र नेहालाई गम्भीर घाइते बनाएको घटनाको सत्यतथ्य छानबिन गरी दोषी उपर कडा भन्दा कडा कार्बाही गर्न सम्बन्धित निकायलाई हाम्रो पार्टी जिल्ला समिति जोडदार माग गर्दै उचित क्षतिपूर्तिका लागि अपिल गर्दछौं । उक्त घटनामा संलग्न रहेका व्यक्तिहरुलाई सत्ता र पहुँचका आधारमा संरक्षण गरेको पाईएमा हाम्रो पार्टी जिल्ला समिति कडा संघर्ष मा उत्रिन बाध्य हुनेछौ ।’
घाँटी रेटेर हत्या गरिएकी माया श्री जवलपुर मावि सैलोडामा कक्षा १२ मा अध्यनरत थिइन् । प्रतिनिधि सभा र प्रदेश सभा सदस्य निर्वाचनमा उनी म्यादी भएर शिवनाथमा खटिएकी थिइन् । डडेल्धुरामा उपचार भई रहेकी उनकी भदै नेहा जवलपुर माविमा कक्षा ९ मा अध्ययनरत छन् ।
मंगलबार विहान लुगा सिलाउन कुलाउ जान्छु भन्दै माया नेहा सहित घरबाट आएकी थिइन् । साँझसम्म घर नपर्केपछि दोस्रो दिन खोजी गर्दा उनी शिवनाथ मन्दिर नजिक मृत भेटिएकी हुन् ।
प्रहरीको प्रारम्भिक अनुसन्धानमा कपडा सिलाउन भन्दै आएकी मायालाई सशस्त्र प्रहरी कोलीले केही दिन अघि खोसेको आफ्नो मोबाइल लिन बोलाएको खुलेको छ । मोबाइल लिन बोलाएकी मायालाई उनले जङ्गलतिर लगेर हत्या गरेको प्रहरीको आशंका छ ।
बहमुतले मायाको हत्यालाई अमावनीय भन्दै उनीप्रति श्रद्धाञ्जी अर्पण गरेको छ । गम्भीर घाइते नेहाको स्वास्थ्य लाभको कामना र घर परिवारमा समवेदना दिइएको छ ।
