महेन्द्रनगर । सत्तारुढ रास्वपा साँसद ज्ञानेन्द्र सिंह महतापछि एमाले सांसद तथा पार्टीका कञ्चनपुर इन्चार्ज कृपाराम रानाले पनि जिल्ला फर्केपछि प्रमुख जिल्ला अधिकारी (सिडिओ) सित छलफल गर्न सुरु गरेका छन् ।
फागुन २१ गतेको निर्वाचनमा कञ्चनपुर ३ बाट निर्वाचित भएपछि साँसद महताले निर्वाचन क्षेत्रमा हुँदा पटक पटक सिडिओसित छलफल गर्दै आएका छन् ।
अहिले साँसद महता संसद बैठकका लागि काठमाडौंमा छन् । उनी काठमाडौंमा भएका बेला एमाले साँसद रानाले आइतबार प्रमुख जिल्ला अधिकारी मदन कोइरालासित जिल्लाका विभिन्न समस्याबारे छलफल गरेका छन् ।
सार्वजनिक विदाका दिन प्रशासन कार्यालयमा चाड पर्वमा हुने कालो बजारी, कृत्रिम अभाव, मूल्यवृद्धि, खाना पकाउने एलपी ग्याँस तथा मलखादको आपूर्ति, महाकाली सिँचाइ आयोजना तेस्रो चरण मुआब्जा वितरण, विपद् व्यवस्थापन र सीमा समस्या लगायतका विषयमा छलफल गरिएको छ ।
छलफलमा रानाले जतालाई मार्का नहुने गरी सबै समस्याको समाधान खोज्न पर्नेमा जोड दिए ।
कार्यक्रममा उनले आपूmले संसद बैठकमा जिल्लामा विभिन्न समस्याबारे सरकारको ध्यानाकर्षण गराएको उल्लेख गरे ।
छलफलमा एमाले केन्द्रीय लेखा आयोगका सचिव ईश्वरी प्रसाद खरेल, एमाले कञ्चनपुर सचिव पल्लवराज भट्ट, उप सचिव राजीव खड्का लगायत नेता सहभागी भए ।
प्रमुख जिल्ला अधिकारी कोइरालाले जिल्ला प्रशासन कार्यालयबाट प्रदान गरिने सेवा प्रवाहलाई थप सहज, प्रभावकारी र नागरिकमैत्री बनाउने गरी काम भइरहेको जानकारी दिए। उनले जनतालाई प्रशासनिक सेवा लिन कठिनाइ नहोस् भन्ने उद्देश्यले कार्यालयको सेवा व्यवस्थापन तथा समन्वयमा आवश्यक सुधार गर्दै आएको बताए।
