भीमदत्तमा यस्तो मनोमानी : प्रक्रिया विनै काँग्रेस नेतृको पसलबाट किनियो पोशाकका कपडा, लेखा समितिका संयोजकलाई दिइयो सिलाउने जिम्मा

महेन्द्रनगर । भीमदत्त नगरपालिकाले उप मेयर निलम लेखक जोशी सहित ३९ जना जनप्रतिनिधिका लागि पोशाक खरिद गरेको छ ।

मेयर पदम बोगटीको निर्देशनमा महेन्द्रनगरस्थित महालक्ष्मी इम्पोरियम र सिटी टेलरिङ्ग एण्ड सटिङ्ग सुटिङ्गबाट पोशाकका कपडा किनेर सिलाउन दिइएको छ । सिटी टेलरिङ्गमा अहिले पोशाक सिलाई भई रहेको छ ।

deepak

महालक्ष्मी इम्पोरियमबाट पेटीकोट, ब्लाउज र सारी किनिएका छन् । सिटी टेलरिङ्गबाट कोटको कपडा किनिएको हो । अहिले सिटी टेलरिङ्गमा कोट सहित ब्लाउज र पेटीकोट सिलाउने कार्य गरिएको छ ।

मेयर बोगटीको निर्देशनमा उप मेयर लेखकको अर्डरमा पोशाकका लागि कपडा खरिद गरिएको जनप्रतिनिधिले बताए । उनीहरुका अनुसार जनप्रतिनिधिका पोशाकका लागि नगर सभा र कार्यपालिकामा छलफल समेत गरिएको छैन । स्थानीय तह निर्वाचनपछि भीमदत्तमा कार्यपालिकाका चार बैठक बसेका छन् । नगर प्रवक्ता खड्काले पनि पोशाक सम्बन्धी नगर सभाबाट निर्णय गरिएको छैन ।

भीमदत्तका प्रमुख प्रशासकीय अधिकृत याम नारायण गौली समेत पोशाक खरिद सम्बन्धी जानकारी नभएको बताउँछन् । नगरपालिकाको कार्यक्रममा नभएकाले उनी पोशाक खरिदको भुक्तानी नदिने पक्षमा देखिएका छन् ।

‘कार्यक्रममै नभएको कुराको कार्यालयले भुक्तानी गर्दैन, कपडा खरिदबारे मलाई कुनै जानकारी छैन’ उनले भने,‘जनप्रतिनिधिले नै तिर्नु पर्छ ।’

सिटी टेलरिङ्गका सञ्चालक हरिहर परियारले उप मेयर जोशीको अर्डर अनुसार कोट, पेटीकोट र ब्लाउज सिलाउने कार्य भई रहेको बताए ।

‘ब्लाउज र पेटीकोटको कपडा सिल्न दिइएको छ, कोटको कपडा यहींको हो’ उनले भने,‘उप मेयरसापको अर्डर हो, भुक्तानी पछि नगरपालिकाबाट दिन्छौ भन्नु भएको छ, उधारोमा काम भइ रहेको छ ।’

सिटी टेलरिङ्गका सञ्चालक परियार भीमदत्त नगरपालिकाको कार्यपालिका सदस्य हुन् । उनी आफैं भीमदत्तमा लेखा समितिको संयोजक छन् ।

कपडा खरिद गरिएको महालक्ष्मी इम्पोरियम काँग्रेस सम्बद्ध नेपाल महिला संघका नेतृ मधु भारतीको हो । उनले पसलको कारोबार श्रीमान टेकराज भारतीले हेर्ने भएकाले आफूलाई कतिको कपडा किनिएको हो भन्ने थाहा नभएको बताइन् ।

भीमदत्त नगरपालिकाका प्रवक्ता महेन्द्र खड्काले मेयर बागेटीको निर्देशनमा मेयर बागेटीको निर्देशनमा कपडा किनेर सिलाई गरिएको जानकारी दिए ।

‘पहिलो नगर सभामा केही जनप्रतिनिधि टिसर्टमा आएका थिए, त्यो बेला अमर्यादित पोशाकमा आए भन्ने सुनियो, त्यसमा दलित समुदायका जनप्रतिनिधि छन्’ उनले भने,‘वहाँहरुका लागि कपडा खरिद गरिएको छ ।’

(साभार : सीमा रेखा)

सम्बन्धित
Loading...